రాజీనామాలపై తెలంగాణ కాంగ్రెసులో విభజన

హైదరాబాద్: తెలంగాణ రాష్ట్ర ఏర్పాటు ప్రక్రియపై కేంద్రం నుంచి స్పష్టమైన ప్రకటన కోరుతూ చేసిన రాజీనామాలను ఆమోదింప జేసుకునే విషయంలో కాంగ్రెసు తెలంగాణ నాయకుల్లో రెండు వాదనలు వినిపిస్తున్నాయి. ఈ నెల 28వ తేదీలోగా కేంద్రం నుంచి స్పష్టమైన ప్రకటన రాకపోతే రాజీనామాలను ఆమోదించాలని స్పీకర్ పై ఒత్తిడి తేవాలని చేసిన నిర్ణయంపై కొందరు కాంగ్రెసు నాయకులు వెనక్కి తగ్గుతున్నారు. కొందరు మాత్రం వెనక్కి తగ్గాల్సిన అవసరం లేదని, అలా వెనక్కి తగ్గితే ప్రజల్లో పలుచన అవుతామని మరి కొంత మంది వాదిస్తున్నారు. రాజీనామాలను ఆమోదింప జేసుకునే విషయంలో ప్రభుత్వ చీఫ్ విప్ మల్లు భట్టి విక్రమార్క వంటి వారే కాకుండా రాజకీయ పార్టీలు, ప్రజా సంఘాల జెఎసిలో కీలక భూమిక పోషించిన మాజీ మంత్రి కె జానారెడ్డి వంటివారు కూడా వెనక్కి తగ్గుతున్నారు. కాంగ్రెసును ఇరకాటంలో పట్టడానికే తెలుగుదేశం, తెలంగాణ రాష్ట్ర సమితి రాజీనామాలను ఆమోదింపజేసుకునే విషయానికి ప్రాధాన్యం ఇస్తున్నాయనేది వారు చెబుతున్న కారణం. తెలంగాణపై కేంద్ర ప్రభుత్వం స్పష్టంగానే ఉందని, అందువల్ల కేంద్రంపై ఒత్తిడి అవసరం లేదని వారంటున్నారు.

రాజీనామాల ఆమోదంపై వెనక్కి తగ్గుతున్నవారి వాదనతో పార్లమెంటు సభ్యుడు మధుయాష్కీ వంటి కాంగ్రెసులోని కొంత మంది తెలంగాణ అతివాద నాయకులు విభేదిస్తున్నారు. ఒక్కసారి రాజీనామాలు చేసిన తర్వాత వెనక్కి తగ్గితే ప్రజల నుంచి తీవ్రమైన వ్యతిరేకతను ఎదుర్కోవాల్సి ఉంటుందని, ప్రజలు రాజీనామాలను కోరుకుంటున్నారని మధు యాష్టీ వంటి నేతలు అభిప్రాయపడుతున్నారు. రాజీనామాలపై వెనక్కి తగ్గాలనే వాదనను తెలంగాణ వ్యతిరేక కుట్రగా కూడా వారు భావిస్తున్నారు. జెఎసిలో ఒక నిర్ణయం తీసుకున్న తర్వాత వెనక్కి తగ్గడం వల్ల పరువు పోతుందని కూడా వారంటున్నారు. కాగా, రాజీనామాలను ఆమోదింపజేసుకునే విషయంలో తాము తీసుకున్న నిర్ణయం నుంచి వెనక్కి తగ్గేది లేదని జెఎసి కన్వీనర్ ప్రొఫెసర్ కోదండరామ్ అంటున్నారు.