బాబు లాంటి మోసగాడు లేడు: పార్వతి

హైదరాబాద్: తెలుగుదేశం అధ్యక్షుడు నారా చంద్రబాబు నాయుడి అంతటి మోసగాడిని తాను చూడలేదని ఎన్టీఆర్ తెలుగుదేశం పార్టీ అధ్యక్షురాలు, స్వర్గీయ ఎన్టీ రామారావు రెండో భార్య లక్ష్మీపార్వతి వ్యాఖ్యానించారు. ఎన్టీఆర్ ను గద్దె దించి ముఖ్యమంత్రి కావాలనే దురుద్దేశంతోనే చంద్రబాబు కాంగ్రెసు నుంచి తెలుగుదేశం పార్టీలోకి వచ్చారని ఆమె ఆరోపించారు. ఎన్టీఆర్ వర్ధంతి సందర్భంగా ఆమె సోమవారం ఒక టీవీ చానెల్ తో మాట్లాడారు.

తెలుగుదేశం పార్టీకి ఇలాంటి దుస్థితి దాపురిస్తుందని తాను అనుకోలేదని ఎన్టీఆర్ కు నివాళులు అర్పించిన అనంతరం ఆమె మీడియా ప్రతినిధులతో అన్నారు. చంద్రబాబు నాయుడే పార్టీకి ఈ దుస్థితి కల్పించారని ఆమె విమర్శించారు. ఎన్టీఆర్ చావుకు కారణమైనవారిని తాను వదిలిపెట్టనని ఆమె అన్నారు. ఎన్టీఆర్ కోరిక మేరకే తాను ఆయనను పెళ్లాడినట్లు ఆమె తెలిపారు. పెరాలెసిస్ తో బాధపడుతున్న సమయంలో తనను పెళ్లి చేసుకుంటావా అని ఎన్టీఆర్ అడిగితే తాను అంగీకరించానని, పదేళ్లుగా తనను చూశారు కాబట్టి తనను ఆ విధంగా అడిగారని ఆమె చెప్పారు.