ఆత్మహత్యలు చేసుకోవద్దు: మంత్రి శ్రీధర్

హైదరాబాద్: తెలంగాణ రాష్ట్ర సాధనకు విద్యార్థులు ఆత్మహత్యలు చేసుకోవద్దని ఉన్నత విద్యాశాఖ మంత్రి డి.శ్రీధర్ బాబు విద్యార్థులకు విజ్ఞప్తి చేశారు. రాష్ట్రాభివృద్ధికి మానవ వనరులు ఎంతో అవసరమని, భవిష్యత్తు తెలంగాణ రాష్ట్రాభివృద్ధిని దృష్టిలో పెట్టుకుని విద్యార్థులు ఆలోచించాల్సిన అవసరం ఉందని ఆయన మంగళవారం మీడియా ప్రతినిధులతో అన్నారు. మనం భౌతికంగా బతికి ఉంటేనే ఏదైనా సాధించగలమని ఆయన అన్నారు. ఉద్యమాన్ని శాంతియుతంగా ముందుకు తీసుకుని పోయి లక్ష్యాన్ని సాధించాలని ఆయన విద్యార్థులకు సూచించారు.

శాంతియుతంగా ఆందోళనలను కొనసాగించడం ద్వారా లక్ష్యాన్ని సాధించగలమనే నమ్మకం తనకు ఉందని ఆయన చెప్పారు. వేణుగోపాల్ రెడ్డి ఆత్మహత్య తనను ఎంతో కలచివేసిందని ఆయన అన్నారు. విద్యార్థి కుటుంబ సభ్యులకు ఆయన సానుభూతి తెలిపారు. విద్యార్థి కుటుంబ సభ్యులను ప్రభుత్వ పరంగా కూడా ఆదుకుంటామని ఆయన హామీ ఇచ్చారు.