నలుగురితో నారాయణ: ట్విట్టర్ లోకి ఒబామా

వాషింగ్టన్‌: ప్రపంచవ్యాప్తంగా కోట్లాదిమంది సభ్యులున్న మైక్రోబ్లాగింగ్‌ వెబ్‌ సైట్‌ 'ట్విట్టర్‌'లోకి అమెరికా అధ్యక్షుడు బరాక్‌ ఒబామా కూడా ప్రవేశించారు. హైతీ భూకంప బాధితుల సహాయకార్యక్రమాలను సమన్వయపరుస్తున్న అమెరికా రెడ్‌క్రాస్‌ సంస్థ కార్యాలయాన్ని ఒబామా దంపతులు మంగళవారం సందర్శించారు. హైతీ బాధితులను ఆదుకోవటంలో ట్విట్టర్‌ ఒక వేదికగా ప్రముఖపాత్ర పోషిస్తున్న నేపథ్యంల ఆ వెబ్‌ సైట్‌కు ఒక సందేశాన్ని పంపించారు. 'కార్యక్రమాల అమలు తీరును పరిశీలించటానికి అధ్యక్షుడు ఒబామా, ప్రథమ మహిళ మిచెల్లీ ఇక్కడున్నారు. తొలిసారిగా ట్విట్టర్‌లోకి వచ్చారు' అని రాసి ఉన్న సందేశాన్ని ఒబామా పంపించారు. హైతీకి సాయమందిస్తున్న రెడ్‌క్రాస్‌ సిబ్బందికి కృతజ్ఞతలు తెలిపారు.

అధ్యక్ష బాధ్యతలు స్వీకరించినప్పటి నుంచీ విద్యారంగానికి అత్యధిక ప్రాధాన్యమిస్తున్న ఒబామా ఆ రంగంలో చేపట్టదలచిన సంస్కరణలకు మరో 135 కోట్ల డాలర్లు కేటాయించాలని కాంగ్రెస్‌ను కోరనున్నారు. అధ్యక్షభవనం 'వైట్‌హౌస్‌' మంగళవారం ఈ విషయాన్ని వెల్లడించింది. విద్యారంగానికి అమెరికా ప్రభుత్వం ఇప్పటికే 435 కోట్ల డాలర్లు కేటాయించింది. భారత్‌, చైనా విద్యార్థులకు ధీటుగా అమెరికా విద్యార్థులు గణితం, సైన్స్‌ రంగాల్లో ముందంజ వేయాలని ఒబామా తరచూ చెబుతుంటారు.

దేశ పరిస్థితులపై కాంగ్రెస్‌ ను ఉద్దేశించి అధ్యక్షుడు చేసే ఉపన్యాసం (స్టేట్‌ ఆఫ్‌ ది యూనియన్‌ అడ్రస్‌) ఈ నెల 27న ఉంటుందని వైట్‌హౌస్‌ తెలిపింది. ఒబామాకు ఇది తొలి ఉపన్యాసం. గత ఏడాది 20న అధ్యక్ష బాధ్యతలు స్వీకరించిన ఒబామా బుధవారంతో తొలి ఏడాది పూర్తి చేసుకుంటారు. ఆయన పనితీరుపై 45 నుంచి 57 శాతం మంది అమెరికన్లు సంతృప్తి వ్యక్తం చేశారని వివిధ సర్వేలు వెల్లడించాయి.