సెప్టెంబర్ నుంచి ఇంటింటికీ గ్యాస్: సిఎం

హైదరాబాద్: ఇంటింటికీ గ్యాస్ సరఫరా కార్యక్రమాన్ని సెప్టెంబర్ నుంచి ప్రారంభించనున్నట్లు ముఖ్యమంత్రి కె. రోశయ్య చెప్పారు. ప్రత్యేక ఆర్థిక మండళ్లపై ఆయన శుక్రవారం సమీక్ష జరిపారు. ఉత్పత్తి రంగంలో పారిశ్రామికాభివృద్ధి రేటు 25 నుంచి 30 శాతానికి పెంచాలని ఆయన అధికారులను కోరారు. కాకినాడ, విశాఖపట్నం మధ్య పెట్రో కెమికల్స్ ఇండస్ట్రీ రంగానికి రాష్ట్ర వాటా కింద రూ. 50 కోట్ల నిధులు మంజూరుకు ఆయన అంగీకరించారు. రాష్ట్రంంలో 73 ప్రత్యేక ఆర్థిక మండలళ్ల అభివృద్ధికి భూముల కేటాయింపును వేగవతం చేయాలని ఆయన ఆదేశించారు.

కాగా, రాష్ట్ర ప్రభుత్వం శుక్రవారం ప్రపంచ బ్యాంకుతో మూడు ప్రధానమైన ఒప్పందాలు చేసుకుంది. రాష్ట్రంలో రోడ్ల అభివృద్ధికి రూ. 3,165 కోట్ల రూపాయల రుణం ఇవ్వడానికి ప్రపంచ బ్యాంక్ అంగీకరించి ఒప్పందం చేసుకుంది. గ్రామీణ నీటి సరఫరా పథకాలకు రూ. 864 కోట్ల రూపాయలు కేటాయించడానికి, మున్సిపాలిటీల అభివృద్ధికి రూ. 167 కోట్ల రూపాయల రుణం ఇవ్వడానికి ప్రపంచ బ్యాంకు ఒప్పందం కుదుర్చుకుంది. ఈ పథకాలన్నింటినీ వచ్చే ఐదేళ్లలో పూర్తి చేస్తామని ముఖ్యమంత్రి చెప్పారు.