తెలంగాణ జెఎసి కలిసే ఉంది: ఈటెల రాజేందర్

హైదరాబాద్: తెలంగాణ రాజకీయ జెఎసి కలిసే ఉందని తెలంగాణ రాష్ట్ర సమితి (తెరాస) శాసనసభా పక్ష నాయకుడు ఈటెల రాజేందర్ స్పష్టం చేశారు. జెఎసిలో చీలిక వచ్చినట్లు వచ్చిన వార్తల్లో నిజం లేదని ఆయన అన్నారు. తెలంగాణ కోసం హైదరాబాదులోని ఇందిరా పార్కు వద్ద కొనసాగుతున్న రిలే నిరాహార దీక్ష శిబిరం వద్ద ఆయన శుక్రవారం మీడియా ప్రతినిధులతో మాట్లాడారు. జెఎసిలో అన్ని పార్టీలు కలిసే ఉన్నాయని, ఇందులో అనుమానం లేదని ఆయన చెప్పారు.

సిద్ధాంతాలను, పార్టీల జెండాలను పక్కన పెట్టి తెలంగాణ కోసం నాయకులంతా కలసి వచ్చారని, అయితే ఇలా పని చేయడం అంత సులభం కాదని, ఆ పార్టీలకు ముందుకు సాగుతున్న క్రమంలో కొన్ని ఇబ్బందులు ఎదురు కావడం సహజమేనని, వాటిని అధిగమిస్తూ ముందుకు పోతామని ఆయన అన్నారు. తమ పార్టీకి అటువంటి ఇబ్బందులుండవు కాబట్టి సమస్య లేదని, మిగతా పార్టీల నాయకులకు అది అంత సులభం కాదని ఆయన అన్నారు. సభలకు అనుమతి ఇవ్వకపోవడం అత్యవసర పరిస్థితిని తలపిస్తోందని ఆయన విమర్శించారు. ప్రజాస్వామికంగా నిర్వహించుకునే సభలకు అనుమతి ఇవ్వకపోవడం ప్రజాస్వామ్యాన్ని ఖూనీ చేయడమేనని ఆయన అన్నారు.