ఆస్ట్రేలియాలో ఇండియన్లపై తాజా దాడి

మెల్బోర్న్: భారతీయులపై తమ దేశంలో జరుగుతున్న దాడులపై ఆస్ట్రేలియా ప్రధాని కెవిన్ రుడ్ విచారం వ్యక్తం చేసి ఇరవై నాలుగు గంటలు కూడా గడవక ముందే తాజాగా బ్రిస్బేన్ లో ఇద్దరు భారతీయులపై దాడి జరిగింది. వారిపై వేర్వేరుగా దాడులు జరిగాయి. గతరాత్రి మెక్ గ్రెగర్ లోని తన ఇంటి వద్ద ఫోన్ బాక్స్ ను వాడుతున్న 25 ఏళ్ల భారతీయ యువకుడిపై ఆస్ట్రేలియన్లు దాడి చేసి దోపిడీకి పాల్పడ్డారు. ముఖంపై పిడిగుద్దులు గుద్ది డబ్పులు దోచుకెళ్లారు. నిందితుల కోసం పోలీసులు గాలిస్తున్నారు.

కాగా, మరో సంఘటనలో టాక్సీ డ్రైవర్ పై ఈ తెల్లవారు జామున దాడి జరిగింది. బ్రిస్బేన్ లోని కారిండేల్ లో ఇద్దరు వ్యక్తులు భారతీయ టాక్సీ డ్రైవర్ తో వాదనకు దిగారు. వారు భారత టాక్సీ డ్రైవరుపై దాడికి దిగారు. ముఖంపై తీవ్రమైన గాయాలతో టాక్సీ డ్రైవర్ ప్రిన్సెస్ అలెంగ్జాండ్రా ఆస్పత్రిలో చేరాడు. టాక్సీ డ్రైవరుపై దాడి చేసిన 28, 25 ఏళ్ల ఇద్దరు వ్యక్తుల కోసం పోలీసులు గాలిస్తున్నారు.