మేం ఎవరి కబంధ హస్తాల్లో లేం: నాగం

హైదరాబాద్: తాము ఎవరి కబంధ హస్తాల్లో లేమని తెలుగుదేశం పార్టీ తెలంగాణ నాయకుడు నాగం జనార్దన్ రెడ్డి స్పష్టం చేశారు. తాము తమ పార్టీ అధ్యక్షుడు నారా చంద్రబాబు నాయుడి కబంధ హస్తాల్లో ఉన్నట్లు వచ్చిన వ్యాఖ్యలను ఆయన శుక్రవారం మీడియా ప్రతినిధుల సమావేశంలో ఖండించారు. తాము తెలంగాణ రాష్ట్ర ఏర్పాటుకు కట్టుబడి ఉన్నామని, తెలంగాణ ఉద్యమానికి సహకరిస్తున్నామని, కింది స్థాయి నుంచి తమ పార్టీ కార్యకర్తలు తెలంగాణలో ఉద్యమాలకు సహకరిస్తున్నారని ఆయన చెప్పారు. విద్యార్థులు చేపట్టిన పాదయాత్రకు తమ పార్టీ కార్యకర్తలు సహకరిస్తున్నారని ఆయన చెప్పారు.

తమ తెలంగాణ శాసనసభ్యులు, పార్లమెంటు సభ్యులు రాజీనామాలు చేశారని, తాము ఎవరికి రాజీనామాలు ఇవ్వాలో వారికే ఇచ్చామని, సోనియా గాంధీకో మరొకరికో ఇవ్వలేదని ఆయన అన్నారు. తెలంగాణ రాజకీయ జెఎసి నుంచి కాంగ్రెసు వారు బయటకు పోకూడదనే తాము కోరుకుంటున్నట్లు ఆయన తెలిపారు. తాము జెఎసి నిర్ణయాలకు కట్టుబడి ఉంటామని ఆయన చెప్పారు. తెలంగాణ విద్యార్థుల ఆత్మహత్యలపై ముఖ్యమంత్రి రోశయ్య కేంద్ర ప్రభుత్వానికి వివరించాలని ఆయన డిమాండ్ చేశారు.