తెలంగాణపై తెర వెనక సంప్రదింపులు

న్యూఢిల్లీ: తెలంగాణపై సంప్రదింపుల ప్రక్రియ ఆగిపోలేదని, ఆ ప్రక్రియ కొనసాగుతోందని ఎఐసిసి అధికార ప్రతినిధి మనీష్ తివారీ అన్నారు. కేంద్ర హోం మంత్రి పి. చిదంబరం ఈ నెల 5వ తేదీన ప్రారంభించిన చర్చల ప్రక్రియ కొనసాగుతోందని ఆయన శుక్రవారం సాయంత్రం మీడియా ప్రతినిధులతో అన్నారు. తెలంగాణపై యంత్రాంగం ఏర్పాటులో జాప్యంపై విలేకరులు ప్రశ్నించగా ఆయన ఆ విధంగా అన్నారు. యంత్రాంగంపై మీడియా ప్రతినిధులు పదే పదే ప్రశ్నించగా తెరవెనక సంప్రదింపుల ప్రక్రియ కొనసాగుతూనే ఉన్నదని ఆయన జవాబిచ్చారు. హోంమంత్రి తదితరులు ఈ ప్రక్రియను సాగిస్తున్నారని ఆయన చెప్పారు.

తెర వెనక చర్చలు గతంలో చాలా సార్లు మంచి ఫలితాలు ఇచ్చాయని, దౌత్యపరమైన అంశాల్లో ఈ చర్చలు చాలా ప్రయోజనకరంగా ఉంటాయని ఆనయ అన్నారు. తెలంగాణపై చర్చల ప్రక్రియ ఆగిపోలేదని, అది చురుగ్గానే సాగుతోందని ఆయన అన్నారు. సంక్లిష్టమైన, కఠినమైన విషయాలపై రాత్రికి రాత్రే నిర్ణయం తీసుకోలేం కదా అని ఆయన అన్నారు.