ముస్లిం స్త్రీలు బుర్ఖా తీయాల్సిందే: సుప్రీం

న్యూఢిల్లీ: మతపరమైన మనోభావాలు దెబ్బ తింటాయనే కారణంగా వోటర్ గుర్తింపు కార్డులపై ఫొటోలను వ్యతిరేకించలేమని సుప్రీంకోర్టు శుక్రవారం ప్రకటించింది. నేనింకా బుర్ఖాలోనే ఉంటానంటే సరిపోదని ప్రధాన న్యాయమూర్తి కెజి బాలకృష్ణన్, జస్టిస్ దీపక్ వర్మలతో కూడా సుప్రీంకోర్టు బెంచ్ ముస్లిం మహిళలను ఉద్దేశించి అన్నది. వోటరు గుర్తింపు కార్డులపై తమ ఫొటోలు ఉండకూడదని, వాటి వల్ల తమ మతపరమైన మనోభావాలు దెబ్బ తింటాయని భావిస్తే వోటు వేయకూడదనే నిర్ణయం తీసుకోవాలని సుప్రీంకోర్టు వ్యాఖ్యనించింది. అంతగా వారు మతవాదులైతే వోటు వేయకూడదని అన్నది.

ముస్లిం మహిళలకు కూడా వోటింగ్ ఫొటో గుర్తింపు కార్డులు అనివార్యమని ఎన్నికల కమిషన్ ఇచ్చిన ఆదేశాలను సవాల్ చేస్తూ తమిళనాడుకు చెందిన ఎం అజ్మల్ ఖాన్ అనే వ్యక్తి సుప్రీంకోర్టుకు ఎక్కాడు. ముస్లిం మహిళలు ఎన్నికల్లో పోటీ చేయాలనుకున్నప్పుడు బుర్కా సంగతేమిటని సుప్రీంకోర్టు ప్రశ్నించింది. ఈ కేసు విచారణను సుప్రీంకోర్టు మరో రెండు వారాలకు వాయిదా వేసింది. మతపరమైన మనోభావాలు చట్టపరమైన నిబంధనలకు అతీతంగా కాకూడదని సుప్రీంకోర్టు అభిప్రాయపడింది.