భారత చిత్రాలపై పాక్ లో నిషేధ యోచన

న్యూఢిల్లీ: ఐపియల్ వేలం పాటల్లో పాకిస్తాన్ క్రికెట్ క్రీడాకారులకు లభించని ఆదరణ చిలికి చిలికి గాలివానగా మారుతోంది. ఇరు దేశాల మధ్య సంబంధాలపై ప్రభావం చూపుతోంది. ఐపియల్ లో పాకిస్తాన్ ఆటగాళ్లకు తగిన స్థానం లభించకపోవడం వెనక భారత ప్రబుత్వ పాత్ర ఉందని పాకిస్తాన్ ప్రభుత్వం ఆరోపిస్తోంది. దానికి ప్రతీకారంగా పాకిస్తాన్ ప్రభుత్వం తమ దేశంలో భారత టీవీ న్యూస్ చానెల్స్ పై, చిత్రాలపై నిషేధం విధించే ఆలోచన చేస్తోంది. ఐపియల్ మ్యాచులను ప్రసారం చేయకూడదని పాకిస్తాన్ లోని కేబుల్ ఆపరేటర్లు నిర్ణయించుకున్నారు.

పాకిస్తాన్ క్రికెట్ క్రీడాకారులకు ఐపియల్ వేలం పాటలో తగిన గుర్తింపు లభించకపోవడంపై పాకిస్తాన్ ప్రతిపక్ష నాయకులు జాతీయ అసెంబ్లీలో ప్రభుత్వాన్ని నిలదీశారు. పాకిస్తాన్ అటగాళ్లను విస్మరించడంపై ఐసిసికి ఫిర్యాదు చేయాలని పాకిస్తాన్ క్రికెట్ బోర్డు సిద్ధమవుతోంది. భారత్ లో జరిగే ప్రపంచ హాకీ కప్ పోటీల నుంచి పాకిస్తాన్ తప్పుకోవాలనే డిమాండ్ కూడా పాకిస్తాన్ లో పెరుగుతోంది.