మాటలకందని విషాదం: సెల్ పేలి వివాహిత మృతి

రైల్వేకోడూరు: గల్ఫ్‌ దేశమైన కువైట్‌లో ఉన్న భర్తతో ఫోన్‌ మాట్లాడుతూ సెల్‌ఫోనే యమపాశంగామారి మరణించిన ఒక మహిళ విషాద గాధ ఇది. ఈ సంఘటన ఉర్తగడ్డపోడు పంచాయతీ వైఎస్‌ఆర్‌ నగర్‌లో శుక్రవారం రాత్రి చోటు చేసుకొంది. జలకం రామచంద్రయ్య సంవత్సరం క్రితం బతుకుదెరువుకోసం కువైట్‌ కు వెళ్ళాడు. అతనిభార్య లావణ్య ఒక సంవత్సరం వయస్సు కలిగిన బాబు ఉన్నాడు. కువైట్‌ లో శుక్రవారం సెలవు దినం కాబట్టి భారతదేశంలో ఉన్న తమ బార్య, బిడ్డలు, బంధువులు, స్నేహితులతో ఫోనుమాట్లాడడం పరిపాటి. శుక్రవారం రాత్రి 10.30 గంటలకు భర్తనుండి ఫోన్‌ రానే వచ్చింది. లావణ్య ఎంతో ఆత్రుతగా భర్తతో సంభాషణ ప్రారంభించింది.

ఆమెకు చివరి ఘఢియలో ఏమోకానీ సెల్‌ ఫోన్‌ కు చార్జింగ్‌ అయిపోయ్యింది. భర్త మాటలు కట్‌ అవుతాయన్న ఆత్రుత ఆమెను వెంటాడింది. చార్జింగ్‌పెట్టి భర్తతో మాట్లాడడం ప్రారంభించింది. కొద్దిసేపటికి సెల్‌ పేలిపోయి ఆమె చెవుల నుండి పొగలు రావడంతో అక్కడక్కడే మృతిచెందిందని స్థానికులు తెలిపారు. విద్యుత్‌ షాక్‌ కొట్టి మృతి చెందిందా, లేక ఫోన్‌ ప్రభావం వల్ల మృతి చెందిందా అనేది. పోస్ట్‌ మార్టమ్‌ ద్వారా పోలీసులు తేల్చాల్సి ఉంది. సంవత్సరం వయస్సు కల్గిన కుమారుడు తల్లి శవంపై పడి అమ్మాఅని ఏడుస్తూంటే ఆ గ్రామం మొత్తం ఆదృశ్యాని చూసి శోకసముద్రంలో మునిగిపోయింది. ఆమె ఉపయోగించిన సెల్‌ఫోన్‌ చైనాపీస్‌ కావడం విశేషం.