భారత్ ప్రతి భారతీయుడిది: రాహుల్

పాట్నా: ఇతర ప్రాంతాలపై దాడులు చేస్తున్న శివసేన, ఎంఎన్ఎస్ లపై కాంగ్రెసు ప్రధాన కార్యదర్శి రాహుల్ గాంధీ విరుచుకుపడ్డారు. భారత్ ప్రతి ఒక్క భారతీయుడిదని ఆయన అన్నారు. తన దేశంలో ఎక్కడైనా భారతీయులపై దాడి జరిగితే తాను మౌనంగా ఉండలేనని ఆయన అన్నారు. థాకరే ఏమంటున్నారో తనకు అనవసరమని, తనకు కావాల్సింది ఒక విధానమని, అది భారత్ ప్రతి భారతీయుడనేదని ఆయన మంగళవారం మీడియా ప్రతినిధుల సమావేశంలో అన్నారు.

బీహార్, ఉత్తరప్రదేశ్ వారికి భారతదేశంలో ఎక్కడికైనా వెళ్లే హక్కు ఉందని ఆయన అన్నారు. భారతీయులపై దేశంలో ఎక్కడైనా దాడులు జరిగితే తాను మౌనంగా ఉండలేనని ఆయన అన్నారు. ముంబై దాడుల సందర్భంగా ఉగ్రవాదులను హతమార్చిన ఎన్ఎస్జీలో బీహారీ, ఉత్తరప్రదేశ్ కు చెందిన వారు, మరాఠీలు అందరూ ఉన్నారని ఆయన సోమవారం అన్నారు.