తెలంగాణ కోసమే కమిటీ: కోమటిరెడ్డి

హైదరాబాద్: తెలంగాణ రాష్ట్ర ఏర్పాటుకే కేంద్ర ప్రభుత్వం కమిటీ వేసిందని తెలంగాణకు చెందిన రాష్ట్ర మంత్రి కోమటిరెడ్డి వెంకటరెడ్డి అన్నారు. కేంద్ర ప్రభుత్వం కమిటీ వేయడాన్ని ఆయన ఆహ్వానించారు. సమైక్యాంధ్ర కోసం కమిటీ వేస్తున్నామని కేంద్ర ప్రభుత్వం చెప్పలేదని ఆయన బుధవారం మీడియా ప్రతినిధులతో అన్నారు. తెలంగాణ రాష్ట్ర ఏర్పాటుకు మాత్రమే ప్రభుత్వం కమిటీ వేసిందని ఆయన అన్నారు.

డిసెంబర్ 9వ తేదీన కేంద్ర హోం మంత్రి పి. చిదంబరం చేసిన ప్రకటనకు అనుగుణంగా కమిటీ పని చేస్తుందని ఆయన అభిప్రాయపడ్డారు. కమిటీకి కాలపరిమితి ఉండాలని ఆయన అన్నారు. నిర్దిష్ట కాలపరిమితిలో కమిటీ నివేదిక ఇస్తే బాగుంటుందని ఆయన అన్నారు. కాంగ్రెసు తెలంగాణ జెఎసిలో కొనసాగాలా, వద్దా అనే విషయంపై పార్టీ అధిష్టానం చూసుకుంటుందని ఆయన అన్నారు.