తొవ్వలపై తెలంగాణ వంటా వార్పూ

హైదరాబాద్: తెలంగాణపై కేంద్ర ప్రభుత్వం నుంచి స్పష్టమైన కాలపరిమితితో కూడిన కార్యాచరణ వెల్లడికి డిమాండ్ చేస్తూ తెలంగాణ రహదారులపై ప్రజలు గురువారం వంటా వార్పూ కార్యక్రమం చేపట్టారు. తెలంగాణ రాష్ట్ర సాధనకు శాంతియుత ఉద్యమాల్లో భాగంగా ఈ కార్యక్రమం చేపట్టారు. ఇందులో భాగంగా రాజీవ్ రహదారిపై, వరంగల్ జాతీయ రహదారిపై, ఇతరు రహదార్లపై తెలంగాణ ప్రజలు వంటలు వండుకుని సామూహికంగా భోజనాలు చేశారు. ఈ కార్యక్రమాన్ని తెలంగాణ జెఎసి కన్వీనర్ కోదండరామ్ రంగారెడ్డి జిల్లా షామీర్ పేటలో ప్రారంభించారు. ఈ ప్రారంభ కార్యక్రమంలో తెలుగుదేశం నాయకుడు టి. దేవేందర్ గౌడ్, ప్రజా సంఘాల నాయకులు విఠల్ తదితరులు పాల్గొన్నారు.

తెలంగాణ ప్రజల సంఘటిత శక్తిని చాటడానికే ఈ కార్యక్రమం చేపట్టినట్లు కోదండరామ్ మీడియా ప్రతినిధులతో చెప్పారు. తెలంగాణ రాష్ట్రం సాధించే వరకు తెలంగాణ ప్రజలు సంఘటితంగా పోరాటం చేస్తారని తెలియజేయడానికి వంటా వార్పూ కార్యక్రమం చేపట్టామని ఆయన అన్నారు. తెలంగాణ సాధించే వరకు ప్రజలు సంఘటితంగా ముందుకు సాగుతారని ఆయన అన్నారు. తెలంగాణకు అనుకూలంగా ప్రభుత్వం నిర్ణయం తీసుకోకపోతే ఆందోళనను ఉధృతం చేస్తామని ఆయన చెప్పారు. వంటావార్పూ కార్యక్రమంలో భాగంగా మహిళలు రోడ్లపై బతుకమ్మ ఆడారు. ప్రజలు కళాప్రదర్శనలు ఇచ్చారు. ట్రాఫిక్ కు అంతరాయం కలగకుండా ఈ వంటా వార్పూ కార్యక్రమం నడిచింది.