వైయస్ మళ్ళీ పుట్టాడు! చిన్నారికి వైయస్ పేరు

రెంటచింతల: దివంగత నేత డాక్టర్‌ వైయస్ రాజశేఖర్‌ రెడ్డి మృతి చెందిన మరుసటి రోజే తమకు కుమారుడు పుట్టడంతో ఆయనపై అభిమానాన్ని చాటుకుంటూ ఆ చిన్నారికి వైయస్ పేరు పెట్టించింది ఓ వీరాభిమాని కుటుంబం. మండలంలోని రెంటాల గ్రామానికి చెందిన యూత్‌ కాంగ్రెస్‌ మండల ప్రధాన కార్యదర్శి మోర్తాల ఉమామహేశ్వరరెడ్డి, మాధవి వైయస్ అకాలమృతి చెందిన ఆందోళనలో ఉన్నారు. మరికొన్ని గంటల్లోనే మాధవి గురజాలలో మగబిడ్డను ప్రసవించింది. వారికి తమ కుమారుడికి వైయస్ పేరు పెట్టుకోవాలని బలమైన కోరిక కలిగింది. అది కూడా వైయస్ కుమారుడైన వైయస్ జగన్‌ మోహన్‌ రెడ్డి సమక్షంలో నామకరణం చేయాలని నిర్ణయం తీసుకొని ఐదు నెలలుగా ఎదురుచూశారు.

ఈ విషయాన్ని మాచర్ల శాసనసభ్యుడు పిన్నెల్లి రామకృష్ణారెడ్డికి తెలియపరిచి జగన్‌ అపాయింట్‌మెంట్‌ తీసుకున్నారు. వీరందరూ పీఆర్కేతో కలసి బుధవారం రాత్రి పులివెందులకు తరలివెళ్లారు. జగన్‌ తన స్వగృహంలో గురువారం వైయస్ పేరును ఆ చిన్నారికి నామకరణ చేసి ఆశీస్సులందించారు. వైయస్ స్వగృహంలో ఆయన పేరును పెట్టి అన్నప్రాసనం చేయటంతో ఆ కుటుంబ ఆనందానికి అవధులు లేవు.