ఏమైనా ఉంటే సోనియాకు చెప్పాలి: డిఎస్

హైదరాబాద్: పిసిసి సమన్వయ కమిటీ కూర్పుపై ఏమైనా అభ్యంతరాలుంటే తమ పార్టీ అధ్యక్షురాలు సోనియా గాంధీకి చెప్పాలని ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ పార్టీ నాయకులకు సూచించారు. సమన్వయ కమిటీపై అభ్యంతరాలపై బహిరంగ ప్రకటనలు చేయవద్దని ఆయన సోమవారం మీడియా ప్రతినిధుల సమావేశంలో పార్టీ నాయకులకు విజ్ఞప్తి చేశారు. పిసిసి సమన్వయ కమిటీ కూర్పుపై అపోహలు కూడదని ఆయన అన్నారు. సమన్వయ కమిటీ విషయంలో ఎఐసిసి నిబంధనలు మారాయని, మారిన నిబంధనల మేరకు వీరప్ప మొయిలీ కమిటీ చైర్మన్ గా ఉంటారని ఆయన చెప్పారు. పార్టీలో ఉన్న కీలకమైన వ్యక్తులపై ఆరోపణలు చేస్తున్నవారు వాటికి ఆధారాలు చూపాలని ఆయన అన్నారు. రాజ్యసభ సభ్యుడు కెవిపి రామచందర్ రావుపై వస్తున్న ఆరోపణల్లో రుజువులుంటే విచారణ జరిపించాలని తమ పార్టీ నాయకులు పాల్వాయి గోవర్దన్ రెడ్డి, అమోస్ కోరాలని ఆయన అన్నారు.

ముస్లిం రిజర్వేషన్లపై తమ ప్రభుత్వం చిత్తశుద్ధితో ఉందని ఆయన చెప్పారు. పార్టీపరంగా, ప్రభుత్వ పరంగా అధ్యయనం చేసిన తర్వాత హైకోర్టు తీర్పును సుప్రీంకోర్టులో సవాల్ చేస్తామని ఆయన చెప్పారు. ముస్లిం రిజర్వేషన్ల విషయంలో న్యాయపరంగా చేయాల్సిందంతా ప్రభుత్వం చేస్తుందని ఆయన చెప్పారు. ముస్లిం రిజర్వేషన్ల విషయంలో హైకోర్టు లేవనెత్తిన అంశాలను పరిశీలించి ప్రభుత్వం సుప్రీంకోర్టుకు వెళ్తుందని ఆయన చెప్పారు. ముస్లిం రిజర్వేషన్లపై కాంగ్రెసు చిత్తశుద్ధిని ప్రశ్నించే హక్కు తెలుగుదేశం పార్టీకి లేదని ఆయన అన్నారు. ముస్లింల సంక్షేమాన్ని తెలుగుదేశం పార్టీ ఎప్పుడు కూడా పట్టించుకోలేదని ఆయన అన్నారు. ముస్లింలకు 12 శాతం రిజర్వేషన్లు కల్పిస్తామని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ఇచ్చిన హామీని ప్రస్తావిస్తూ అది ఎలా సాధ్యమని ఆయన అడిగారు.