కె చంద్రశేఖర రావు ఫ్యామిలీనే అన్నాను: కొడాలి నాని

విజయవాడ: తన వ్యాఖ్యలపై తీవ్ర నిరసన వ్యక్తమవుతుండడంతో, అదుర్స్ సినిమా ప్రదర్శనకు బ్రేకులు పడడంతో తెలుగుదేశం శాసనసభ్యుడు, సినిమా నిర్మాత కొడాలి నాని మాట మార్చారు. తాను ఆ విధంగా అనలేదని, తాను తెలంగాణ రాష్ట్ర సమితి (తెరాస) కుటుంబాన్ని మాత్రమే అన్నానని ఆయన సర్ది చెప్పే ప్రయత్నం చేశారు. సమైక్యాంధ్ర నినాదంతో పాదయాత్ర చేస్తున్న విద్యార్థులను నందిగామలో పోలీసులు అరెస్టు చేయడంపై తాను స్పందిస్తూ కెసిఆర్ ఫ్యామిలీ ఆధిపత్య ధోరణిని మాత్రమే ప్రశ్నించానని ఆయన అన్నారు.

హైకోర్టు అనుమతి తీసుకుని, పోలీసు రక్షణ మధ్య సినిమాను ఆడించుకున్నామని చెప్పినట్లు ఆయన తెలిపారు. తాను తెలంగాణ ప్రజల మనోభావాలను దెబ్బ తీసే విధంగా మాట్లాడలేదని ఆయన అన్నారు. తెలుగుదేశం తెలంగాణ శాసనసభ్యుల నుంచి నాని వ్యాఖ్యలకు వ్యతిరేకత ఎదురవుతోంది. జూనియర్ ఎన్టీఆర్ విజ్ఞప్తి వల్లనే సినిమాను ఆడినిచ్చామని, నానిని చూసి కాదని తెలుగుదేశం శాసనసభ్యుడు రేవంత్ రెడ్డి అన్నారు. పని ముగిశాక అలా మాట్లాడడం నానికే చెల్లిందని ఆయన అన్నారు.