కొడాలి నానిపై కేసు నమోదు

హైదరాబాద్/విజయవాడ: తెలుగుదేశం శాసనసభ్యుడు, అదుర్స్ సినిమా నిర్మాత కొడాలి నానిపై హైదరాబాదులోని కూకట్ పల్లి పోలీసు స్టేషనులో కేసు నమోదైంది. రెచ్చగొట్టే వ్యాఖ్యలు చేశారంటూ తెలంగాణ జెఎసి నాయకులు కొడాలి నానిపై ఫిర్యాదు చేశారు. దీంతో పోలీసులు నానిపై కేసు నమోదు చేశారు. కొడాలి నానిని వెంటనే అరెస్టు చేయాలని జెఎసి నాయకులు డిమాండ్ చేశారు.

కాగా, కొడాలి నాని తీరును సమైక్యాంధ్ర జెఎసి నాయకుడు, మాజీ మంత్రి మండలి బుద్ధప్రసాద్ తప్పు పట్టారు. నాని రెచ్చగొట్టే ప్రకటనలు చేయడం సరి కాదని ఆయన అన్నారు. మోహన్ బాబు పరిస్థితి వేరని, మోహన్ బాబు సమైక్యవాదాన్ని వినిపించారని ఆయన అన్నారు. నాని అదుర్స్ సినిమా విడుదలకు ముందు ఆ ప్రకటన చేయాల్సిందని, ఇప్పుడు కాదని ఆయన మంగళవారం మీడియా ప్రతినిధులతో అన్నారు. ముఖ్యమంత్రి రోశయ్యపై నాని చేసిన విమర్సలను కూడా ఆయన ఖండించారు.