తిరుగుబాటుకు కాంగ్రెసు తెలంగాణ ఎమ్మెల్యేలు

హైదరాబాద్: తెలంగాణ రాష్ట్ర ఏర్పాటు విషయంలో కేంద్ర ప్రభుత్వం ఏ మాత్రం వెనక్కి తగ్గినట్లు అనిపించినా శాసనసభ సమావేశాలను అడ్డుకోవాలని కాంగ్రెసు తెలంగాణ శాసనసభ్యులు భావిస్తున్నారు. శ్రీకృష్ణ కమిటీ విధివిధానాల్లో జాప్యం చేసినా, కాల పరిమితి విధించకపోయినా తాము బడ్జెట్ సమావేశాలను అడ్డుకుంటామని వారంటున్నారు. అలాగే, కమిటీ విధివిధానాలు తెలంగాణ రాష్ట్ర ఏర్పాటుకు వ్యతిరేకంగా ఉన్నా సహించబోమని వారు చెబుతున్నారు.

రెండు, మూడు రోజుల్లో సమావేశమై తమ వ్యూహాన్ని ఖరారు చేసుకుంటామని వారు చెబుతున్నారు. తాము బడ్జెట్ సమావేశాలకు దూరంగా ఉండడమే కాకుండా ఇతర శాసనభ్యులను శాసనసభకు వెళ్లకుండా అడ్డుకుంటామని వారు చెబుతున్నారు. తెలంగాణకు వ్యతిరేకంగా విధివిధానాలు ఉంటే సహించబోమని కాంగ్రెసు నాయకుడు, మాజీ మంత్రి టి. జీవన్ రెడ్డి మీడియా ప్రతినిధులతో అన్నారు.