సమస్యకు పరిష్కారం చూస్తాం: శ్రీకృష్ణ

న్యూఢిల్లీ: ఆంధ్రప్రదేశ్ లోని సమస్యకు పరిష్కారం కనుక్కుంటామని రాష్ట్ర పరిస్థితిపై అధ్యయానికి ఏర్పాటైన కమిటీ చైర్మన్ జస్టిస్ శ్రీకృష్ణ అన్నారు. కమిటీ సభ్యులను వ్యక్తిగతంగా కలిసి మీడియావారు ఇబ్బంది పెట్టవద్దని, కమిటీ తగిన సమాచారం ప్రకటన రూపంలో వెలువరిస్తుందని ఆయన చెప్పారు. మూడు గంటల పాటు ఢిల్లీలో జరిగిన కమిటీ సమావేశానంతరం ఆయన శనివారం మీడియా ప్రతినిధులతో మాట్లాడారు. కమిటీ సభ్యులందరితో కలిసి ఆయన మీడియా ముందుకు వచ్చారు. రాష్ట్రంలోని అన్ని వర్గాలను సంప్రదిస్తామని ఆయన చెప్పారు. అందరి మనోభావాలకు అనుగుణంగా తమ కమిటీ పని చేస్తుందని ఆయన హామీ ఇచ్చారు. తమకు అందరి సహకారం లభిస్తుందని ఆశిస్తున్నట్లు ఆయన తెలిపారు. హైదరాబాదుతో పాటు రాష్ట్రంలోని అన్ని ప్రాంతాల్లో తాము పర్యటిస్తామని ఆయన చెప్పారు. కమిటీ పని ఈ రోజు నుంచే మొదలైందని, రాష్ట్రంలోని అన్ని వర్గాలకు న్యాయం జరిగేలా చూస్తామని శ్రీకృష్ణ చెప్పారు.

తదుపరి సమావేశంలో తమ కమిటీ కార్యాచరణను వెల్లడిస్తుందని కమిటీ మెంబర్ సెక్రటరీ చెప్పారు. రాజకీయ పార్టీలకు, వివిధ సంఘాలకు తమ కమిటీ అందుబాటులో ఉంటుందని ఆయన చెప్పారు. కమిటీ ఇప్పటికే తన పని ప్రారంభించిందని ఆయన చెప్పారు. హైదరాబాదు ఎప్పుడు వెళ్లాలనేది నిర్ణయించలేదని, కమిటీ కేంద్ర కార్యాలయం ఢిల్లీలోనే ఉంటుందని ఆయన చెప్పారు. వినతిపత్రాల రూపంలో కూడా విజ్ఞప్తులను స్వీకరిస్తామని ఆయన చెప్పారు. నిర్ణీత గడువు కన్నా ముందుగానే నివేదిక సమర్పించేందుకు ప్రయత్నిస్తామని ఆయన చెప్పారు. సమాజంలోని అన్ని వర్గాల ప్రజలతో సంప్రదింపులు జరుపుతామని ఆయన చెప్పారు. అన్ని వర్గాల ప్రజలతో సమావేశమవుతామని ఆయన చెప్పారు. రాష్ట్రంలో శాంతి నెలకొల్పడమే తమ ధ్యేయమని జస్టిస్ శ్రీకృష్ణ అన్నారు. నెలకు కనీసం రెండు సార్లయినా కమిటీ సమావేశం జరిగేలా చూస్తామని దుగ్గల్ చెప్పారు. ఎవరు ఏయే పనులు చేయాలనే కేటాయింపు జరిగిందని ఆయన చెప్పారు. తమకు అందరి సహకారం లభిస్తుందని అనుకుంటున్నామని ఆయన అన్నారు. కమిటీ సభ్యులను దుగ్గల్ మీడియా ప్రతినిధులకు తొలుత పరిచయం చేశారు.