పుణె పేలుళ్ళ నేపద్యంలో షిర్డి అప్రమత్తం

షిర్డీ: పుణేలో శనివారం రాత్రి జరిగిన బాంబు పేలుడు సంఘటన నేపథ్యంలో ప్రముఖ పుణ్య క్షేత్రమైన షిర్డీలో పోలీసులు అప్రమత్తంగా ఉండాలని ఆదేశాలు జారీ అయ్యాయి. మందిరానికి వచ్చే భక్తులు, వెంటతీసుకువస్తున్న కానుకలను క్షుణ్ణంగా తనిఖీ చేసిన అనంతరమే లోపలకు అనుమతిస్తున్నారు. దేశంలో ఎక్కడ బాంబు పేలుళ్లు జరిగినా ముందుగా షిర్డీలో అప్రమత్తం చేస్తారు. కానీ ఇక్కడ విధులు నిర్వహిస్తున్న పోలీసులు మాత్రం మొత్తం 'సాయిదయ' అంటూ నిర్లక్ష్యంగా వదిలేయడం పరిపాటిగా మారింది. సాయిబాబా మందిరం, పరిసరాల భద్రత కోసం పోలీసులు, ప్రైవేటు భద్రత దళాలు 80 మందిని నియమించారు.

ఇందులో అనేక మంది సిబ్బంది నామమాత్రంగా విధులు నిర్వహిస్తున్నారు. షిర్డీలో బాంబు నిర్వీర్యం బృందం ఉంది. కానీ వారికి డాగ్‌స్క్వాడ్‌ అందుబాటులో లేదు. ఉన్న ఒక శునకం చనిపోవడంతో దాని స్థానంలో మరో శునకాన్ని ఏర్పాటు చేయలేదు. అత్యాధునిక స్కానింగ్‌ యంత్రాలతోపాటు ఇతర భద్రతాపరమైన పరికరాలు సమకూర్చాలని రెండు, మూడు సంవత్సరాల నుంచి డిమాండ్‌ చేస్తున్నప్పటికీ పట్టించుకునే వారే కరువయ్యారు. సాయిబాబా సంస్థాన్‌ వద్ద 23 మెటల్‌ డిటెక్టర్‌ ప్రవేశ ద్వారాలున్నాయి. అందులో కొన్ని పనిచేయక అలంకార ప్రాయంగా మిగిలిపోయాయి. నిత్యం వేల సంఖ్యల్లో భక్తులు దర్శించుకునే షిర్డీ పుణ్య క్షేత్రంలో భద్రతా దళాలతోపాటు ఆధునిక సాంకేతిక సామాగ్రి అందుబాటులో ఉంచాల్సిన అవసరం ఎంతైనా ఉంది.