కెసిఆర్ దీక్షపై ఫోటోలతో సహా బయటపెడతా: లగడపాటి

విశాఖపట్నం: తెరాస అధ్యక్షుడు కె చంద్రశేఖర్ రావు చేపట్టిన దీక్షలోని అసలు మర్మమేమిటో తాను పార్లమెంటులో వెల్లడిస్తానని విజయవాడ ఎంపీ లగడపాటి రాజగోపాల్‌ చెప్పారు. 3పూటలా భోజనానికి సరిపడే రీతిలో రెండువేల కేలరీల శక్తిని ఐవీ ఫ్లూయిడ్స్‌ ద్వారా తీసుకుంటూ..ఆయన దానిని ఆమరణ నిరాహార దీక్షగా చెప్పుకొన్నారని ఆరోపించారు. "నా వ్యాఖ్యలకు ఆధారాలున్నాయి. స్వయంగా హైదరాబాద్‌లోని నిమ్స్‌ వైద్యులు సంతకం చేసి ఇచ్చిన పత్రాలు, ఫొటోలు, వీడియోలను పార్లమెంటులో విడుదలచేస్తా. 11రోజుల దీక్షలో కేసీఆర్‌ ఏరోజు ఏమేం తీసుకున్నారో అన్నీచెబుతా"అని తెలిపారు.

సోమవారమిక్కడ 'మీట్‌-ది-ప్రెస్‌' కార్యక్రమంలో లగడపాటి పాల్గొన్నారు. "పటేల్‌లు, రజాకార్లు, నిజాం పాలకులు ఊచకోత కోసినప్పుడు మీ తాతముత్తాతలు ఏమైనా ఆదుకున్నారా? ఆ అరాచకాలు జరిగినప్పుడు సరిహద్దుల్లోని ఆంధ్ర జిల్లాలవారే ఆదుకున్నారు"అని తెలంగాణప్రాంత నేతలనుద్దేశించి పేర్కొన్నారు. తాను ఎంపీ పదవికిచేసిన రాజీనామాను విరమించుకున్నానని లగడపాటి స్పష్టం చేశారు.