కాపీరైట్ సవరణ కమిటీకి అమీర్ ఖాన్ రాజీనామా

న్యూఢిల్లీ: కాపీరైట్‌ చట్టాలలో ప్రతిపాదిత సవరణల్ని సమీక్షించేందుకు ఏర్పాటైన కమిటీకి బాలీవుడ్‌ నటుడు అమీర్‌ ఖాన్‌ రాజీనామా చేశారు. కమిటీలో కొందరు సభ్యులతో ఆయనకు విభేదాలు ఏర్పడ్డ నేపథ్యంలో ఈ నిర్ణయం తీసుకున్నారు. దీనిపై కేంద్ర మంత్రి కపిల్‌ సిబాల్‌ విచారం వ్యక్తం చేస్తూ కమిటీలో విభేదాలు మీడియాకు ఎక్కడాన్ని తప్పుపట్టారు. "నాపై తప్పుడు విమర్శలు ప్రచారం చేయడంతో అసలు విషయం పక్కదోవ పడుతోందని" రాజీనామా లేఖలో అమీర్‌ పేర్కొన్నారు.

కమిటీ సమావేశంలో అమీర్‌ చేసిన వ్యాఖ్యలపై గీత రచయిత జావేద్‌ అఖ్తర్‌ తీవ్రంగా విభేదిస్తూ 'ఖయామత్‌ సే ఖయామత్‌ తక్‌' సినిమాలో 'పాపా కెహతే హై' పాట ప్రాచుర్యం పొందిన విషయాన్ని ప్రస్తావించారు. అప్పటికి అమీర్‌ కొత్త నటుడే అన్న విషయాన్ని గుర్తు చేశారు. సంగీతకారులకు కూడా రాయల్టీలో వాటా దక్కాలని ఆయన వాదించారు. అమీర్‌ మాత్రం నిర్మాతల పక్షం వహించారు. ఈ పరిణామాలే ఆమిర్‌ రాజీనామాకు దారి తీశాయి. సంగీత, సినిమాటోగ్రాఫిక్‌, సాహిత్య కళారూపాలను వాణిజ్య పరంగా వినియోగిస్తే వాటి రూపకర్తలకు రాయల్టీ చెల్లించాలని కాపీరైట్‌ చట్ట సవరణలు ప్రతిపాదించాయి.