లగడపాటిని అరెస్టు చేయాలి: తెలంగాణ కాంగ్రెసు

హైదరాబాద్: రెచ్చగొట్టే ప్రకటనలు చేస్తున్న తమ పార్టీ విజయవాడ పార్లమెంటు సభ్యుడు లగడపాటి రాజగోపాల్ ను అరెస్టు చేయాలని కాంగ్రెసు తెలంగాణ నాయకులు డిమాండ్ చేశారు. తెలంగాణపై తాజా పరిణామాల నేపథ్యంలో కాంగ్రెసు తెలంగాణ నాయకులు శుక్రవారం సమావేశమై పరిస్థితిని సమీక్షించారు. తెలంగాణ జెఎసి కార్యకర్తలు తమ ఇళ్ల ముందు ఆందోళనలు చేపట్టడం సరి కాదని వారన్నారు. మనలను మనం విమర్శించుకుంటే ఇతర ప్రాంతాల నాయకుల ముందు మనమే చులకన అవుతామని వారన్నారు. చలో అసెంబ్లీ కార్యక్రమాన్ని విరమించుకోవాలని వారు తెలంగాణ విద్యార్థులకు విజ్ఞప్తి చేశారు. విద్యార్థులపై లాఠీచార్జీ చేసిన పోలీసు అధికారులపై చర్యలు తీసుకోవాలని వారు ప్రభుత్వాన్ని కోరారు.

కాగా, తమ పార్టీ నాయకులకు వ్యతిరేకంగా ఎబివిపి, ఇతర పార్టీల కార్యకర్తలు ఆందోళనలు చేయడం సరి కాదని తెలుగుదేశం పార్టీ తెలంగాణ నాయకుడు నాగం జనార్దన్ రెడ్డి అన్నారు. తాము ఉద్యమంలోనే ఉన్నామని ఆయన శుక్రవారం విడిగా మీడియా ప్రతినిధుల సమావేశంలో అన్నారు. ఎవరి ఒత్తిడి లేకుండా తామే స్వచ్ఛందంగా రాజీనామాలు చేయడానికి ముందుకు వచ్చామని, కాంగ్రెసు నాయకులు కూడా తమ లాగానే రాజీనామాలు చేయడానికి ముందుకు రావాలని ఆయన అన్నారు. విద్యార్థులు శాంతియుతంగా రేపటి చలో ఆసెంబ్లీ కార్యక్రమాన్ని చేపట్టాలని ఆయన విద్యార్థులకు విజ్ఞప్తి చేశారు. ఈ కార్యక్రమం విషయంలో ప్రభుత్వం సంయమనం పాటించాలని ఆయన కోరారు. మోత్కుపల్లి నర్సింహులు, రావుల చంద్రశేఖర రెడ్డి తదితర తెలంగాణ నాయకులతో కలిసి ఆయన ముఖ్యమంత్రి కె. రోశయ్యను కలిశారు. విద్యార్థులపై పెట్టిన కేసులు ఎత్తివేయాలని ఆయన విజ్ఞప్తి చేశారు.