బందరు- బాపట్ల రైలుమార్గానికి కృషి: పనబాక లక్ష్మి

మోపిదేవి: రానున్న రైల్వే బడ్జెట్‌లో మచిలీపట్నం-బాపట్ల రైలుమార్గం ఏర్పాటుకోసం కృషి చేయనున్నట్లు కేంద్ర చేనేత, జౌళిశాఖ సహాయ మంత్రి పనబాక లకీ అన్నారు. గురువారం ఆమె విలేకరులతో మాట్లాడుతూ ఎప్పటి నుంచో ఈ ప్రాంత ప్రజల చిరకాల కోరికగా ఉన్న ఈ రైలు మార్గం ఏర్పాటుకు శాయశక్తులా ప్రయత్నిస్తానన్నారు. ప్రస్తుతం రాష్ట్రంలో నెలకొన్న ఉద్రిక్తతలను తగ్గించే దిశగా కేంద్రప్రభుత్వం నియమించిన శ్రీకృష్ణ కమిటీకి అన్ని రాజకీయపార్టీలు సహకరించాలని ఆమె కోరారు.

సున్నితమైన అంశాన్ని కొంతమంది రాజకీయ నాయకులు రాజకీయం చేస్తూ విద్యార్థులను పావులుగా ఉపయోగించుకోవడం బాధ కలిగిస్తోందన్నారు. సీమాంధ్ర నాయకుల సేవలు, వస్తువులను వినియోగించరాదని ప్రొఫెసర్‌ కోదండరామ్‌ పిలుపునివ్వడం సరైంది కాదన్నారు. దీని వలన రాష్ట్రంలో ప్రాంతీయ విబేధాలు మరింత పెరిగిపోతాయన్నారు. ప్రొఫెసర్‌ వృత్తిలో ఉన్న కోదండరామ్‌ విజ్ఞతతో వ్యవహరించాలని సూచించారు. సమావేశంలో మండల యూత్‌ కాంగ్రెస్‌ అధ్యక్షుడు కోసూరు శివాజి, రాహుల్‌గాంధీ యూత్‌ అధ్యక్షుడు అర్జా నాగరాజుతోపాటు పలువురు కాంగ్రెస్‌ పార్టీ నాయకులు పాల్గొన్నారు.

కేంద్ర మంత్రి పనబాక లకీ మోపిదేవి శ్రీసుబ్రహ్మణ్యేశ్వరస్వామివారిని దర్శించుకున్నారు. గుడివాడలో ఓ కార్యక్రమంలో పాల్గొనేందుకు వెళుతూ ఆమె మార్గమధ్యంలో స్వామివారిని దర్శించుకుని ప్రత్యేక పూజలు చేశారు.