కొత్త రాజకీయ పార్టీ: గద్దర్

హైదరాబాద్: తెలంగాణలో కొత్త రాజకీయ పార్టీ ఆవిర్భవించే సూచనలను ప్రముఖ ప్రజా వాగ్గేయకారుడు గద్దర్ అందించారు. తెలంగాణ ప్రజలను ప్రస్తుత రాజకీయ పార్టీలు ఇదే విధంగా మోసం చేస్తే అవి నాశమైపోతాయని, ఆ స్థానంలో కొత్త రాజకీయ శక్తి వస్తుందని ఆయన అన్నారు. శనివారం అసెంబ్లీ ముట్టడి కార్యక్రమాన్ని చేపట్టిన విద్యార్థుల వద్దకు వచ్చి ఆయన మీడియా ప్రతినిధులతో మాట్లాడారు. తెలంగాణ కోసం శాంతియుతంగా చలో అసెంబ్లీ చేపట్టిన విద్యార్థులను పోలీసులు అడ్డుకోవడాన్ని ఆయన తప్పు పట్టారు. శాంతియుతంగా ర్యాలీ నిర్వహించి విజ్ఞాపన పత్రం అందించడానికి ప్రయత్నించిన విద్యార్థులను పోలీసులు అడ్డుకున్నారని ఆయన అన్నారు.

ఈ రోజు శాసనసభను విద్యార్థులు, ప్రజలు ముట్టడించలేదని, పోలీసులే ముట్టడించారని, తుపాకులతో మోహరించిన పోలీసులే అసెంబ్లీని ముట్టడించారని ఆయన వ్యాఖ్యానించారు. ఓట్లు పోలీసులు వేశారో, ప్రజలు వేశారో రాజకీయ నాయకులు గుర్తించాలని ఆయన అన్నారు. రాజకీయ పార్టీలు తెలంగాణ ప్రజలను మోసం చేస్తున్నాయని ఆయన విమర్శించారు.