అసెంబ్లీ ముట్టడికి భారీ బందోబస్తు

హైదరాబాద్: శ్రీకృష్ణ కమిటీ విధివిధానాలను వ్యతిరేకిస్తూ తెలంగాణ విద్యార్థుల ఐక్య కార్యాచరణ సమితి (జెఎసి) అసెంబ్లీ ముట్టడికి పిలువునిచ్చిన నేపథ్యంలో హైదరాబాదులోని భారీ బందోబస్తు ఏర్పాటు చేశారు. ఎట్టి పరిస్థితిలోనూ అసెంబ్లీ ముట్టడి జరిపి తీరుతామని ఉస్మానియా విశ్వవిద్యాలయంలో మోహరించిన జెఎసి నాయకులు చెబుతున్నారు. ఉస్మానియా విశ్వవిద్యాలయం ద్వారం వద్ద పెద్ద యెత్తున పోలీసులను మోహరించి, అరెస్టు చేయడానికి సిద్ధంగా ఉన్నారు. శాసనసభకు వెళ్లే దారులన్నింటినీ పోలీసులు మూసేశారు. అసెంబ్లీ చుట్టూ ఇనుప బారికేడ్లు, ఐరన్ ఫెన్సింగ్ ఏర్పాటు చేశారు. అసెంబ్లీకి వచ్చే దారులన్నింటికీ అడ్డంగా బారికేడ్లు, ఐరన్ ఫెన్సింగ్ ఏర్పాటు చేసి మూసేశారు. వేలాదిగా పోలీసులు మోహరించారు.

జిల్లాల నుంచి ఇప్పటికే విద్యార్థులు హైదరాబాదుకు చేరుకున్నట్లు సమాచారం. దాదాపు పది వేల మంది విద్యార్థులు అసెంబ్లీ ముట్టడిలో పాల్గొనే అవకాశాలున్నట్లు భావిస్తున్నారు. ముఖ్యమంత్రి కె. రోశయ్య శాసనసభలో శనివారం బడ్జెట్ ను ప్రతిపాదించనున్న నేపథ్యంలో అసెంబ్లీ ముట్టడికి విద్యార్థులు అసెంబ్లీ ముట్టడికి పిలుపునిచ్చారు. హైదరాబాదులో ఆసెంబ్లీకి వెళ్లే దారుల్లో ఎక్కడా ట్రాఫిక్ ను అనుమతించడం లేదు. విద్యార్థులు అడ్డుకుంటారనే అనుమానంతో స్పీకర్ కిరణ్ కుమార్ రెడ్డి వాహనం మార్చి వేరే కారులో శాసనసభకు చేరుకున్నారు. హైదరాబాదులోని కనీవినీ ఎరుగని రీతిలో బందోబస్తు ఉంది.