స్కామ్ తో నాకేం సంబంధం: బెల్లంకొండ

హైదరాబాద్: మాదక ద్రవ్యాల కుంభకోణంతో తనకేమీ సంబంధం లేదని ప్రముఖ చలనచిత్ర నిర్మాత బెల్లంకొండ సురేష్ స్పష్టం చేశారు. డ్రగ్స్ స్కామ్ కు తన పేరును చేరుస్తూ వార్తలు ప్రసారం కావడాన్ని ఆయన ఖండించారు. ఈ మేరకు ఆయన సోమవారం ఒక తెలుగు టీవీ చానెల్ ప్రతినిధితో మాట్లాడారు. డ్రగ్స్ స్కామ్ లో ఎవరో పట్టుబడితే దాన్ని సినీ పరిశ్రమకంతటికీ అంటగట్టడం సరి కాదని ఆయన అన్నారు.

డ్రగ్స్ స్కామ్ లో పట్టుబడిన కామినేని వెంకటేశ్వర రావు తనకు మంచి మిత్రుడని, తనకు కెవి రావుతో 20 ఏళ్ల పరిచయం ఉందని, అంత మాత్రాన డ్రగ్స్ స్కామ్ తో తనకు సంబంధం ఉండాల్సిన అవసరం లేదని ఆయన అన్నారు. డ్రగ్స్ సరఫరాకు కెవి రావు వాడిన ఇన్నోవా కారును ఒక ట్రావెల్ ఏజెన్సీకి చెందిందని ఆయన అన్నారు. అదే కారును గతంలో తాను శంభో శివ శంభో సినిమా షూటింగ్ కోసం అద్దెకు తీసుకున్నట్లు ఆయన తెలిపారు.