కోట్లకు టోపీ: జీపీఆర్ పున్నారావు అరెస్టు

హైదరాబాద్: కోట్లాది రూపాయలు జనానికి కుచ్చుటోపీ పెట్టి తప్పించుకు తిరుగుతున్న జిపిఆర్ పున్నారావును హైదరాబాదులోని పంజగుట్ట పోలీసులు అరెస్టు చేశారు. హైదరాబాద్ నగరంలో అతనిపై 30కి పైగా కేసులున్నాయి. హైదరాబాదు అమీర్‌ పేటలోని జీపీఆర్‌ చిట్స్ అండ్ హౌసింగ్ ప్రైవేటు లిమిటెడ్ ఎండీగా జి.పున్నారావు జనం నుంచి లక్షలాది రూపాయలు వసూలుచేసి మోసం చేశాడు. అతనిపై పలుచోట్ల కేసులు నమోదయ్యాయి. బాధితులు వినియోగదారుల ఫోరంను ఆశ్రయించారు. దీంతో వినియోగదారుల ఫోరం కేసులు నమోదు చేసి విచారణ చేపట్టింది. నాలుగేళ్ల నుంచి అతడు తప్పించుకు తిరుగుతున్నాడని పోలీసులు చెప్పారు.

ఈ కేసులపై విచారణ చేపట్టిన ఫోరం, పున్నారావు మోసానికి పాల్పడినట్టు పేర్కొంటూ అతణ్ని అరెస్టు చేయాలని ఆదేశించింది. రెండు నెలల క్రితం వినియోగదారుల ఫోరం నుంచి వారెంట్లు అందుకున్న పోలీసులు అప్పటి నుంచి పున్నారావు కోసం గాలిస్తున్నారు. శుక్రవారం అతడు నాంపల్లి కోర్టు వద్ద తచ్చాడుతుండగా సమాచారం అందుకున్న పంజగుట్ట పోలీసులు అదుపులోకి తీసుకున్నారు.