డిప్యూటీ కలెక్టర్ శ్రీలతకు బెయిల్ నిరాకరణ

విజయవాడ: ఆదాయానికి మించి ఆస్తుల కేసులో ప్రత్యేక డిప్యూటీ కలెక్టర్‌ శ్రీలతకు బెయిల్‌ తిరస్కరిస్తూ అవినీతి నిరోధక శాఖ కోర్టు న్యాయమూర్తి సోమవారం ఉత్తర్వులు జారీచేశారు. రామిశెట్టి శ్రీలత ప్రకాశం జిల్లాలో భూసేకరణ ప్రత్యేక డిప్యూటీ కలెక్టర్‌గా ఉన్నారు.

ఈమె నివాస గృహంపై ఏసీబీ అధికారులు దాడి చేసి, ఆదాయానికి మించి రూ. 93 లక్షల మేర ఆస్తులు కలిగి ఉన్నట్లు గుర్తించారు. ఈమేరకు శ్రీలతను అరెస్ట్‌ చేసి, 11న కోర్టులో హాజరుపరిచారు. న్యాయమూర్తి ఆదేశాల మేరకు ఆమెను జిల్లా జైలులో ఉంచారు. బెయిల్‌ కోసం న్యాయవాది పిటిషన్‌ దాఖలు చేశారు. విచారణ అనంతరం బెయిల్‌ నిరాకరిస్తూ న్యాయమూర్తి ఉత్తర్వులు జారీచేశారు.