గుట్ట బ్రహ్మోత్సవాలకు భారీ ఏర్పాట్లు

యాదగిరికొండ: యాదగిరిగుట్ట శ్రీ లక్ష్మి నర్సింహస్వామి బ్రహ్మోత్సవాల్లో మంగళవారం జరుగుతున్న ముఖ్య ఘట్టమైన కల్యాణోత్సవం, రథోత్సవానికి గట్టి భద్రతను ఏర్పాటు చేసినట్లు ఎస్పీ రాజేష్‌కుమార్‌ తెలిపారు. ఆయన స్వామి వారిని దర్శించుకున్న అనంతరం దేవస్థాన గృహంలో విలేకరులతో మాట్లాడారు. బ్రహ్మోత్సవాలకు భక్తులు అధిక సంఖ్యలో వస్తున్నందున ఎలాంటి అవాంఛనీయ సంఘటనలు జరగకుండా 600 మంది సిబ్బందితో భద్రతను ఏర్పాటు చేస్తున్నట్లు తెలిపారు. అలాగే కొండ కింద ఘాట్‌ రోడ్డు నుంచి కొండపై వరకు అక్కడక్కడా పోలీస్‌ సెక్యూరిటీని ఏర్పాటు చేస్తామని చెప్పారు.

ఆలయ పరిసర ప్రాంతాలను, ఆలయంలో ఉన్న కెమెరాలను, జామర్లను, మెటల్‌ డిటెక్టర్లను, డోర్‌ డిటెక్టర్లను పరిశీలించానని, ఇవి పూర్తిగా చెడిపోయాయని, వీటి స్థానంలో కొత్త వాటిని ఏర్పాటు చేయనున్నట్లు ఎస్పీ తెలిపారు. ఈ సమావేశంలో చైర్మన్‌ నర్సింహమూర్తి, ఈవో శ్రీనివాసరావు, స్థానిక సీఐ, ఎస్‌ ఐ కృష్ణ కిషోర్‌, శ్రీనివాస్‌ నాయుడులు ఉన్నారు.