కోదండరామ్ పై కోమటిరెడ్డి చిర్రుబుర్రులు

హైదరాబాద్: తెలంగాణ ఐక్య కార్యాచరణ సమితి (జెఎసి) కన్వీనర్ కోదండరామ్ పై తెలంగాణకు చెందిన రాష్ట్ర మంత్రి కోమటిరెడ్డి వెంకటరెడ్డి చిర్రుబుర్రులాడారు. ప్రొఫెసర్ అయిన కోదండరామ్ తన స్థాయికి తగినట్లుగా ప్రవర్తించడం లేదని ఆయన మండిపడ్డారు. విద్యార్థులపై తాను లాఠీచార్జి చేయించినట్లు కోదండరామ్ మాట్లాడడాన్ని ఆయన ఖండించారు. విద్యార్థులపై తాను లాఠీచార్జీ చేయించానని చెప్పడంలో వాస్తవం లేదని ఆయన అన్నారు. కోదండరామ్ అబద్ధాలు మాట్లాడుతున్నారని ఆయన విమర్శించారు.

రెచ్చగొట్టే ప్రకటనలు చేయడం మానుకోవాలని ఆయన కోదండరామ్ కు సూచించారు. తెలంగాణ రాకపోతే తాము పదవులు వదులుకోవడానికి సిద్ధంగా ఉన్నామని ఆయన స్పష్టం చేశారు. తమను తెలంగాణ ప్రజల ఎదుట దోషులుగా నిలబెట్టేందుకు కోదండరామ్ ప్రయత్నిస్తున్నారని ఆయన వ్యాఖ్యానించారు. ఇటీవల నల్లగొండ జిల్లాలో కోమటిరెడ్డి వెంకటరెడ్డి కాన్వాయ్ ని అడ్డుకున్న తెలంగాణ విద్యార్థులపై పోలీసులు లాఠీచార్జీ చేశారు. ఈ లాఠీచార్జీని కోదండరామ్ ఖండించారు.