కాకా ఇంటిని ముట్టడించిన తెలంగాణవాదులు

హైదరాబాద్: కాంగ్రెసు సీనియర్ నేత, కాంగ్రెసు వర్కింగ్ కమిటీ (సిడబ్ల్యుసి) సభ్యుడు జి వెంకటస్వామి (కాకా) ఇంటిని తెలంగాణ మాల, మాదిగ ఐక్య కార్యాచరణ కమిటీ (జెఎసి) కార్యకర్తలు బుధవారం ముట్టడించారు. తెలంగాణ రాష్ట్ర సాధనకు కాకా పార్టీ పదవికి, ఆయన కుమారుడు జి. వివేక్ పార్లమెంటు సభ్యత్వానికి రాజీనామా చేయాలని వారు డిమాండ్ చేశారు. తెలంగాణ రాష్ట్ర ఏర్పాటుపై కేంద్ర ప్రభుత్వం అనుసరిస్తున్న వైఖరిని వారు తప్పు పట్టారు.

కాకా ఇంటి ముట్టడి సందర్భంగా జెఎసి కన్వీనర్ స్పృహ తప్ప పడిపోయారు. జెఎసి కార్యకర్తలను పోలీసులు అరెస్టు చేశారు. వెంకటస్వామికి వ్యతిరేకంగా జెఎసి కార్యకర్తలు నినాదాలు చేశారు. ఇదిలా వుంటే, తెలంగాణ రాష్ట్ర ఏర్పాటుకు వెంటనే చర్యలు చేపట్టాలని డిమాండ్ చేస్తూ తెలంగాణవాదులు బుధవారం వరంగల్ జిల్లాలో జాతీయ రహదారిపై రాస్తారోకో నిర్వహించారు. ఉస్మానియా, కాకతీయ విశ్వవిద్యాలయాల్లో నక్సలైట్లున్నారనే ప్రభుత్వ నివేదికను వారు తప్పు పట్టారు.