రోశయ్యతో వికె దుగ్గల్ భేటీ

హైదరాబాద్: ఆంధ్రప్రదేశ్ పరిస్థితిపై కేంద్ర ప్రభుత్వం వేసిన జస్టిస్ శ్రీకృష్ణ కమిటీ సభ్య కార్యదర్శి వినోద్ కె. దుగ్గల్ బుధవారం ఉదయం ముఖ్యమంత్రి కె. రోశయ్యను కలిశారు. వీరిద్దరి మధ్య కమిటీకి అవసరమైన మౌలిక సదుపాయాల ఏర్పాటుపై చర్చ జరిగినట్లు తెలుస్తోంది. వికె దుగ్గల్ మంగళవారం సాయంత్రం హైదరాబాదు వచ్చారు. ఆయనను మంగళవారం సాయంత్రమే ప్రభుత్వ ముఖ్య కార్యదర్శి ఎస్వీ ప్రసాద్ కలిశారు. కమిటీకి అవసరమైన మౌలిక సదుపాయాలపై ఆయన దుగ్గల్ తో మాట్లాడారు.

కాగా, హైదరాబాదులో కమిటీ కార్యాలయ భవనం కోసం దుగ్గల్ అన్వేషిస్తున్నారు. సమావేశం ఏర్పాటుకు హైదరాబాదులోని జూబిలీహాల్ ను ఆయన పరిశీలించినట్లు తెలుస్తోంది. కార్యాలయ ఏర్పాటుకు ఆయన గ్రీన్ ల్యాండ్ అతిథి గృహాన్ని, పాత విమానాశ్రయాన్ని, ఏరువాక భవనాన్ని, ఎంసిహెచ్ఆర్డీ భవనాన్ని పరిశీలించే అవకాశం ఉంది. దుగ్గల్ మరోసారి మీడియా సమావేశం కూడా ఏర్పాటు చేసే అవకాశం ఉంది.