ఉప ఎన్నికల్లో కాంగ్రెసు పోటీ: తెరాసకు చెక్

హైదరాబాద్: శాసనసభకు జరిగే ఉప ఎన్నికల్లో తమ పార్టీ పోటీ చేస్తుందని ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ చెప్పారు. శ్రీకృష్ణ కమిటీ విధివిధానాలను వ్యతిరేకిస్తూ 12 మంది శాసనసభ్యులు ఇటీవల రాజీనామా చేశారు. వీరిలో పది తెలంగాణ రాష్ట్ర సమితి (తెరాస) శాసనసభ్యులు కాగా, ఒక్కరు బిజెపికి, మరొరకు తెలుగుదేశం పార్టీకి చెందినవారు ఉన్నారు. ఈ 12 స్థానాలకు ఉప ఎన్నికలు జరగనున్నాయి. ఈ స్థానాలకు జరిగే ఉప ఎన్నికల్లో కచ్చితంగా తమ పార్టీ పోటీ చేస్తుందని శ్రీనివాస్ శుక్రవారం మీడియా ప్రతినిధుల సమావేశంలో చెప్పారు. తాను నిజామాబాద్ నుంచి పోటీ చేసే విషయంపై నిర్ణయం తీసుకోలేదని ఆయన చెప్పారు.

ఉప ఎన్నికలు వచ్చేనాటికి ఏమైనా జరగవచ్చునని, ఇంకా చాలా సమయం ఉందని ఆయన చెప్పారు. ఉప ఎన్నికలు రానీయండి చూద్దామని ఆయన మీడియా ప్రతినిధుల వేసిన ప్రశ్నకు సమాధానంగా అన్నారు. ఉప ఎన్నికలు వచ్చేనాటికి ఏదైనా సాధ్యమని ఆయన అన్నారు. మహిళా రిజర్వేషన్ బిల్లుకు కేంద్ర మంత్రి వర్గం ఆమోదం తెలపడం చారిత్రాత్మకమైందని ఆయన అన్నారు. పార్లమెంటులో బిల్లు ఆమోదానికి అన్ని పార్టీలు సహకరించాలని ఆయన కోరారు. మీడియాపై చీరాల శాసనసభ్యుడు ఆమంచి కృష్ణమోహన్ ఆరోపణలు చేయడాన్ని ఆయన వ్యతిరేకించారు. మీడియాపై విమర్శలు చేయడం సరి కాదని, అధికారంలో ఉన్నవారు మీడియా పట్ల సంయమనం పాటించాల్సి ఉంటుందని ఆయన అన్నారు.