రిమ్స్ లో డాక్టర్ రాజేష్ ఆత్మహత్య

కడప: కడపలోని రిమ్స్ ఆస్పత్రిలో వైద్యుడు రాజేష్ ఆత్మహత్య చేసుకున్నాడు. ఈ సంఘటన రిమ్స్ లో విషాదానికి దారి తీసింది. అతను శనివారం ఉదయం ఆస్పత్రిలోనే ఆత్మహత్య చేసుకున్నాడు. వ్యక్తిగత కారణాల వల్లనే రాజేష్ ఆత్మహత్య చేసుకున్నట్లు అతను రాసి పెట్టిన సూసైడ్ నోట్ ను బట్టి తెలుస్తోంది. అయితే ఆ వ్యక్తిగత కారణమేమిటనేది స్పష్టంగా తెలియడం లేదు. ఆర్థోపెడిక్ సర్జన్ అయిన రాజేశ్ పాయిజన్ ఇంజక్షన్ తీసుకుని ఆత్మహత్య చేసుకున్నాడు.

రోజులాగా శనివారం విధులకు హాజరైన రాజేష్ ఆత్మహత్య చేసుకోవడాన్ని ఆస్పత్రి వర్గాలు జీర్ణించుకోలేకపోతున్నాయి. గత రెండు రోజులుగా రాజేష్ ఎవరితోనూ సరిగా మాట్లాడలేదని అంటున్నారు. మానసిక ఒత్తిడికి గురై అతను ఆత్మహత్య చేసుకున్నాడని కొందరు అంటుండగా, ప్రేమ వైఫల్యమే అతని ఆత్మహత్యకు కారణమని మరి కొందరు అంటున్నారు. ఈ రెండు కోణాల్లోనూ పోలీసులు కేసును దర్యాప్తు చేస్తున్నారు.