అరకులోయలో వేసవి సందడి, పర్యాటకుల రద్దీ

అరకులోయ: వేసవి ప్రారంభం కావడంతో ఆంధ్రా ఊటీ వంటి అరకులోయలో సందడి నెలకొంది. పర్యాటకుల సంఖ్య పెరుగుతోంది. చలిప్రభావం తగ్గడంతో అరకులోయలో పర్యాటకుల తాకిడి మళ్లీ మొదలైంది. నిన్న, మొన్నటి వరకు తగ్గుముఖం పట్టిన పర్యాటకుల సంఖ్య ఒక్కసారిగా ఊపందుకుంది. వేసవి ప్రారంభంతో పాటు వరుసగా శని, ఆది, సోమవారాలు సెలవు దినాలు రావడంతో పర్యాటకులు ఆదివారం అధిక సంఖ్యలో ఇక్కడికి తరలివచ్చారు. వీరిలో ఆంధ్ర పర్యాటకుల సంఖ్యే అధికంగా ఉంది. ఇక్కడి సందర్శిత ప్రాంతాలైన గిరిజన మ్యూజియం, పద్మావతి ఉద్యానవన కేంద్రం,డుంబ్రిగుడ చాపరాయి జలపాతం ప్రాంతాల్లో సందడి సంతరించుకుంది.

గత కొద్ది రోజులుగా పర్యాటకుల తాకిడి తగ్గడంతో వెలవెలబోయిన అరకులోయ టౌన్‌షిప్‌లోని లాడ్జీలు, అతిథి గృహాలు, హోటళ్లు మళ్లీ కిటకిటలాడాయి. పర్యాటకుల రాకతో ఇక్కడి వ్యాపార దుకాణాలు కూడా కలకలలాడాయి. ఇటీవల ఎటువంటి బేరాలు లేక ఇబ్బందులు పడిన వాహనాల యజమానులు పర్యాటకుల రాకతో ఊపిరిపీల్చుకున్నారు.