'కల్కి' ఆశ్రమం వద్ద ఆందోళన, ఉద్రిక్తత

వరదయ్యపాళెం(చిత్తూరు జిల్లా): 'కల్కి' ఆశ్రమ వ్యవహారాలపై పలు ఆరోపణలు వెలువడుతున్న నేపథ్యంలో బుధవారం కూడా నాటకీయ పరిణామాలు చోటుచేసుకున్నాయి. కల్కికి వ్యతిరేకంగా సోమవారం రాత్రి ఇక్కడి కల్కి సంస్థకు చెందిన సమాచార కార్యాలయ షెడ్డును దగ్ధం చేసిన ఆందోళనకారులు మంగళవారం దాడికి పాల్పడ్డారు. వరదయ్యపాళెం మండలం బత్తలవల్లం సమీపంలోని కల్కి గోల్డెన్‌ సిటీ-2పై మంగళవారం ఉదయం వీరు దాడి చేశారు. 8 గంటల సమయంలో గోల్డెన్‌ సిటీ-2లోకి చొరబడి సెక్యూరిటీ రూమును ధ్వంసం చేశారు. పార్కింగ్‌ స్థలంలో నిలిపి ఉన్న మూడు బస్సు అద్దాలను పగుల గొట్టారు. గోల్డెన్‌ సిటీ డార్మెటరీలోని కార్పెట్లు, వస్తు సామగ్రి, గాజు వస్తువులను నాశనం చేశారు. ఈ దాడిలో దాదాపు 20 లక్షల రూపాయల వరకు ఆస్తినష్టం సంభవించినట్లు ఆశ్రమ వర్గాల అంచనా. కొందరు సిబ్బందిపై కూడా దాడి యత్నం చేశారు.

అనంతరం కల్కి భగవాన్‌, భగవతిలను అరెస్ట్‌ చేయాలని డిమాండ్‌ చేస్తూ గోల్డెన్‌సిటీ-2 ముందు ఉన్న తడ-శ్రీకాళహస్తి రోడ్డుపై ఉదయం 9 గంటల సమయంలో రాస్తారోకో చేశారు. ఈ సమయంలో గోల్డెన్‌ సిటీకి వచ్చిన కల్కి ఆశ్రమ బాధ్యులు లోకేష్‌ దాసా, రుద్ర దాసాలను అడ్డుకోవడంతో కొంత ఉద్రిక్తతకు దారితీసింది. పోలీసులు రంగ ప్రవేశం చేయడంతో పరిస్థితి సద్దు మణిగింది.దాడి చేసినవారు సమీపంలోని తొండూరు గ్రామస్తులని పోలీసులు తెలిపారు.