బాబు, రాఘవులు, నారాయణ అరెస్టు

హైదరాబాద్: ధరల పెంపునకు నిరసనగా ఆందోళనకు దిగిన తెలుగుదేశం, వామపక్షాల నాయకులను పోలీసులు అరెస్టు చేశారు. తెలుగుదేశం పార్టీ అధ్యక్షుడు నారా చంద్రబాబు నాయుడు సహా సిపిఐ రాష్ట్ర కార్యదర్శి కె నారాయణ, సిపిఎం రాష్ట్ర కార్యదర్శి బివి రాఘవులులను పోలీసులు అరెస్టు చేశారు. వారితో పాటు తెలుగుదేశం పార్టీ కార్యకర్తలను కూడా పోలీసులు అరెస్టు చేశారు. వారిని పోలీసులు గాంధీనగర్ పోలీసు స్టేషన్ కు తరలించారు. మహాధర్నా అనంతరం తెలుగుదేశం, వామపక్షాల కార్యకర్తలు సచివాలయాన్ని ముట్టిడించేందుకు ర్యాలీగా బయలుదేరారు. ఈ సందర్భంగా పోలీసులకు అరెస్టులకు దిగారు.

కాగా, ధరల పెంపుపై ప్రతిపక్షాల నిరసనలతో శనివారం శాసనసభా కార్యక్రమాలు స్తంభించాయి. సభా కార్యక్రమాలు శనివారం ఉదయం నుంచి ఐదు సార్లు వాయిదా పడ్డాయి. ధరల పెరుగుదలపై చర్చకు ప్రతిపక్షాల సభ్యులు పట్టుబట్టారు. దీంతో సభా కార్యక్రమాలు స్తంభిస్తూ వచ్చాయి. దీంతో స్పీకర్ సభను పదే పదే వాయిదా వేస్తూ వచ్చారు. చివరకు సభను సోమవారానికి వాయిదా వేశారు.