రాష్ట్ర విభజనపై బొత్స హర్షకుమార్ మద్దతు

హైదరాబాద్: రాష్ట్ర విభజన మంచిదేనన్న పంచాయతీరాజ్ శాఖ మంత్రి బొత్స సత్యనారాయణకు కాంగ్రెసు అమలాపురం పార్లమెంటు సభ్యుడు మద్దతు పలికారు. తాము ఎన్నికల ప్రణాళికలో తెలంగాణ రాష్ట్ర ఏర్పాటుకు అభ్యంతరం లేదని చెప్పామని, అయితే దానికి మెజారిటీ ప్రజాప్రతినిధులు వ్యతిరేకత చూపారని, దాంతో సమస్య ఎదురైందని ఆయన సోమవారం మీడియా ప్రతినిధులతో అన్నారు. ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ శ్రీకృష్ణ కమిటీకి ఏ విధమైన నివేదిక ఇస్తారో తనకు తెలియదని ఆయన అన్నారు. శ్రీనివాస్ పార్టీ విధానాన్నే చెప్తారని భావిస్తున్నట్లు ఆయన తెలిపారు.

రాష్ట్ర ఏర్పాటు తర్వాత ఉత్తరాంధ్ర వెనకబడిపోయిందని, తమ ప్రాంతం కూడా వెనకబడి పోయిందని, రాష్ట్ర ఏర్పాటు తర్వాత తమ ప్రాంత అభివృద్ధిపై దృష్టి పెట్టలేదని ఆయన అన్నారు. హైదరాబాద్ అభివృద్ధి మీదనే దృష్టి కేంద్రీకరించారని ఆయన అన్నారు. ఉత్తరాంధ్రలోని కొన్ని ప్రాంతాల్లో ఇప్పటికీ అంటరానితనం ఉందని ఆయన అన్నారు. రాష్ట్రం విడిపోతే తమ ప్రాంత అభివృద్ధిపై దృష్టి కేంద్రీకరించడానికి వీలవుతుందని ఆయన అన్నారు.