చర్చ లేకుండా మహిళా బిల్లుపై వోటింగ్

న్యూఢిల్లీ: తీవ్ర నిరసనల మధ్య మహిళా బిల్లును రాజ్యసభ ఆమోదించింది. అంతకు ముందు చర్చ లేకుండా వోటింగ్ కు రాజ్యసభ ఆమోదం తెలిపింది. చట్టసభల్లో మహిళలకు 33 శాతం రిజర్వేషన్లు కల్పించే మహిళా బిల్లును వ్యతిరేకిస్తూ ఎస్పీ, ఆర్జెడీ, ఎల్జెపి సభ్యులు రాజ్యసభలో ఆందోళనకు దిగారు. బిల్లుకు వ్యతిరేకంగా నినాదాలు చేశారు. పలు మార్లు వాయిదా పడ్డ సభ తిరిగి మంగళవారం సాయంత్రం 3 గంటలకు సమావేశమైంది.

తిరిగి సమావేశమైన తర్వాత కూడా సభ సద్దు మణగలేదు. దీంతో గొడవ మధ్య బిజెపి సభ్యుడు అరుణ్ జైట్లీ చర్చను ప్రారంభించడానికి ప్రయత్నించారు. అయితే అది సాధ్యం కాలేదు. దీంతో చైర్మన్ హమీద్ అన్సారీ చర్చ లేకుండా బిల్లు ఆమోదం కోసం వోటింగ్ కు అనుమతి పొందారు. వోటింగ్ కు పెట్టిన సమయంలో రాజ్యసభలోకి మార్షల్స్ ప్రవేశించారు. వోటింగ్ ప్రక్రియ ప్రారంభమైంది.