సీమవాళ్లు వద్దంటే వద్దు: దామోదర్

హైదరాబాద్: తమ పార్టీ శాసనసభ్యుడు రాయల తెలంగాణ ప్రతిపాదనను కాంగ్రెసు తెలంగాణ సీనియర్ శాసనసభ్యుడు ఆర్ దామోదర్ రెడ్డి కూడా తిరస్కరించారు. గందరగోళ పరిచేందుకే జెసి రాయల తెలంగాణ ప్రతిపాదన ముందుకు తెస్తున్నారని ఆయన గురువారం మీడియా ప్రతినిధులతో అన్నారు. హైదరాబాద్ గురించి మాట్లాడే రాయలసీమ నేతలు హైదరాబాద్ గల్లీల చరిత్ర తెలుసుకోవాలని ఆయన అన్నారు. హైదరాబాదులో భూకబ్జాలకు పాల్పడింది రాయలసీమ గుండాలేనని ఆయన దుయ్యబట్టారు.

రాయలసీమ వల్లనే తమకు ఇబ్బందులు వచ్చాయని ఆయన అన్నారు. పెద్ద మనుషుల ఒప్పందాన్ని ఉల్లంఘించిన తొలి నాయకుడు రాయలసీమకు చెందిన నీలం సంజీవరెడ్డి అని ఆయన అన్నారు. తెలంగాణ నేతలు పరస్పరం విమర్శలు మానుకోవాలని ఆయన సూచించారు. వాహనాలకు తెలంగాణ స్ట్రిక్టర్లు అతికించుకోవడం నిరసన రూపమని ఆయన అన్నారు. దానికి అధికారులు అభ్యంతరం తెలపవద్దని ఆయన సూచించారు. ఈ విషయంలో సీమాంధ్ర నేతలు సంయమనంతో వ్యవహరించాలని ఆయన అన్నారు.