కెసిఆర్ ఎందుకు రాజీనామా చేయరు: ఎర్రబెల్లి

హైదరాబాద్: కె చంద్రశేఖర రావు, విజయశాంతి పార్లమెంటు సభ్యత్వాలకు రాజీనామాలు చేయకుండా రాజీనామాలు చేయాలని తమను అడగమేమిటని తెలుగుదేశం తెలంగాణ శాసనసభ్యుడు ఎర్రబెల్లి దయాకర రావు ప్రశ్నించారు. కాంగ్రెసు వారు రాజీనామాలు చేస్తే తాము రాజీనామాలకు సిద్ధంగా ఉన్నామని ఆయన గురువారం మీడియా ప్రతినిధులతో అన్నారు. తెలంగాణ రాష్ట్ర సమితి (తెరాస) తమ పార్టీని లక్ష్యం చేసుకుని విమర్శలు చేస్తోందని ఆయన అన్నారు.

రాజ్యాంగ సంక్షోభం సృష్టించడానికి అందరూ రాజీనామాలు చేయాలని ఆయన అన్నారు. కాంగ్రెసు సీనియర్ శానససభ్యుడు జెసి దివాకర్ రెడ్డి రాయల తెలంగాణ ప్రతిపాదనను ఎర్రబెల్లి దయాకర రావు వ్యతిరేకించారు. రాయలసీమ వల్లనే తమకు అన్యాయం జరిగిందని ఆయన అన్నారు. తమ రాష్ట్రం తమకు కావాలని, వేరే ప్రాంతాలతో కలవడానికి సిద్ధంగా లేమని ఆయన అన్నారు.