బుద్ధదేవ్ ను చంపే యోచన లేదు: దీపక్

కోల్ కత్తా: పశ్చిమ బెంగాల్ ముఖ్యమంత్రి బుద్ధదేవ్ భట్టాచార్యను హత్య చేసే ఉద్దేశం తమకు లేదని పోలీసులకు పట్టుబడిన మావోయిస్టు నేత తెలుగు దీపక్ అలియాస్ వెంకటేశ్వర రెడ్డి చెప్పారు. 2008లో బుద్ధదేవ్ కాన్వాయ్ పై మావోయిస్టులు దాడి చేసిన విషయం తెలిసిందే. తమకు ఉద్దేశం ఉంటే బుద్ధదేవ్ ను చంపి ఉండేవారమని, బుద్ధదేవ్ కాన్వాయ్ పై హైటెన్షన్ వైర్ పడేలా డైరెక్షనల్ మైన్ పేల్చామని ఆయన చెప్పారు. రాష్ట్ర సిఐడి అధికారుల విచారణలో ఆయన ఆ విషయాలు చెప్పారు.

పోలీసులు తప్పుగా అర్థం చేసుకుని గిరిజనులపై దాడి చేయాలని తాము భావించామని, అదే వారు చేశారని, తద్వారా తాము పునాదిని ఏర్పరచుకోవడానికి వీలైందని ఆయన వివరించారు. ముఖ్యమంత్రి కాన్వాయ్ పై దాడి చేయడం తమ ఉద్యమంలో ఓ మైలు రాయి అని ఆయన అన్నారు. తమిళనాడులోని ఎల్టీటీఇ గ్రూపు నుంచి తాను మందుపాతరలు తయారు చేయడం నేర్చుకున్నట్లు ఆయన తెలిపారు. వెంకటేశ్వర రావును 1987 నుంచి 1995 వరకు మావోయిస్టు నాయత్వం తమిళనాడుకు పంపింది. ఆ తర్వాత దీపక్ లీథల్ డైరెక్షనల్ ల్యాండ్ మైన్ ను తయారు చేయడం నేర్చుకున్నాడు.