లగడపాటీ, ఏదీ నీ తెలుగు ప్రేమ: హరీష్

హైదరాబాద్: కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ పై తెలంగాణ రాష్ట్ర సమితి (తెరాస) నాయకుడు హరీష్ రావు తీవ్రంగా ధ్వజమెత్తారు. తెలుగు ప్రజలపై లగడపాటి రాజగోపాల్ చూపిస్తున్నది కపట ప్రేమ అని ఆయన శుక్రవారం మీడియా ప్రతినిధుల సమావేశంలో అన్నారు. లగడపాటి రాజగోపాల్ కు ఉన్నది తెలుగు ప్రజలపై ప్రేమ కాదని, లగడపాటికి వ్యాపార ప్రయోజనాలే ముఖ్యమని ఆయన అన్నారు. ల్యాంకో పవర్ ప్రాజెక్టు విద్యుత్తును ప్రభుత్వ పరం చేసుకోవాలని ఆయన డిమాండ్ చేశారు. తెలుగు ప్రజలు కరెంట్ లేక ఇబ్బందులు పడుతుంటే, తెలంగాణ రైతులు పంటలు ఎండిపోయి ఆత్మహత్యలకు పాల్పడుతుంటే రాజగోపాల్ ల్యాంకో విద్యుత్తును తమిళనాడుకు, రాజస్థాన్ కు అమ్ముకుంటున్నారని ఆయన ఆరోపించారు. ఇదేనా లగడపాటికి తెలుగు ప్రజలపై ఉన్న ప్రేమ అని ఆయన అడిగారు.

నవభారత్ 95 మెగావాట్ల విద్యుత్ కేంద్రం ఉత్పత్తి చేసే విద్యుత్తును పక్క రాష్ట్రాలకు అమ్మకుండా రాష్టానికి ఇస్తోందని, పక్క రాష్ట్రాలకు అమ్ముకోవడానికి అనుమతి ఉన్నా రాష్ట్ర ప్రజల కోసం నవభారత్ ఆ పని చేస్తోందని ఆయన అన్నారు. తెల్లారి లేస్తే తెలుగు ప్రజలు, కలిసి ఉండాలంటూ ప్రేమ కురిపించే లగడపాటి రాజగోపాల్ మాత్రం ఇతర రాష్ట్రాలకు విద్యుత్తును అమ్ముకుంటున్నాడని ఆయన అన్నారు. కెజి బేసిన్ గ్యాస్ తో లగడపాటి రాజగోపాల్ ల్యాంకో విద్యుత్తును ఉత్పత్తి చేస్తోందని, రాష్ట్రంలోని వనరులను వాడుకుంటూ ఇతర రాష్ట్రాలకు విద్యుత్తును అమ్ముకుంటూ వ్యాపార ప్రయోజనాలు మాత్రమే చూసుకుంటున్నారని ఆయన అన్నారు. వ్యాపారం, డబ్బు సంపాదన మాత్రమే లగడపాటి లక్ష్యమని ఆయన వ్యాఖ్యానించారు. ప్రైవేట్ కంపెనీలకు గ్యాస్ ను కేటాయిస్తున్న ప్రభుత్వం జెన్కోకు మాత్రం కేటాయించడం లేదని ఆయన విమర్శించారు. ఈ విషయంలో కేంద్ర ప్రభుత్వంపై ఒత్తిడి తేవాలని ఆయన ముఖ్యమంత్రి రోశయ్యను డిమాండ్ చేశారు.