సినిమాలపై నిర్ణయం చేయలేదు: చిరు

హైదరాబాద్: తాను సినిమాల్లో నటించే విషయంపై ఏ విధమైన నిర్ణయం తీసుకోలేదని ప్రజారాజ్యం పార్టీ అధినేత చిరంజీవి అన్నారు. శుక్రవారం శాసనసభలో తనను కలిసిన మీడియా ప్రతినిధులతో మాట్లాడారు. సినిమాలు, రాజకీయాల్లో నటించడం గురించి ఒక మీడియా ప్రతినిధి ప్రస్తావించగా మేకప్ లేకుండా నటించడం కష్టమని ఆయన అన్నారు. తాను నటించాలని కొందరు కోరుతున్నారని, టీవీల్లోనూ పత్రికల్లోనూ వార్తలు వస్తున్నాయని, అయితే తాను ఏ నిర్ణయమూ తీసుకోలేదని ఆయన అన్నారు.

టీవీల్లో, పత్రికల్లో వస్తున్న వార్తలను చూస్తున్నానని, అంతకు మించి ఏమీ లేదని ఆయన అన్నారు. ముఖ్యమంత్రిగా ఉంటూనే ఎన్టీఆర్ సినిమాల్లో నటించారని ఒక విలేకరి ప్రస్తావించగా ముఖ్యమంత్రిగా ఉన్నప్పుడా, ప్రతిపక్ష నేతగా ఉన్నప్పుడా అని ఆయన ఆరా తీశారు. ఏ సినిమాల్లో నటించారు అని అడిగారు.