రాజకీయ లబ్ధికే బాబు పర్యటన: అరుణ

హైదరాబాద్: వరద తాకిడి ప్రాంతాల్లో పర్యటన చేస్తున్న తెలుగుదేశం పార్టీ అధ్యక్షుడు నారా చంద్రబాబు నాయుడిపై రాష్ట్ర మంత్రి డికె అరుణ తీవ్రంగా ధ్వజమెత్తారు. రాజకీయ లబ్ధి కోసమే చంద్రబాబు వరద తాకిడి ప్రాంతాల్లో పర్యటిస్తున్నారని ఆమె శనివారం మీడియా ప్రతినిధుల సమావేశంలో విమర్శించారు. వరద బాధితులు ఇన్నాళ్ల తర్వాత ఇప్పుడు చంద్రబాబుకు గుర్తు వచ్చారా అని ఆమె అడిగారు.

ప్రతిపక్ష నేతగా చంద్రబాబు పూర్తిగా విఫలమయ్యారని ఆమె అన్నారు. శాసనసభలో ప్రజా సమస్యలపై చర్చించాల్సింది పోయి అర్థం లేని వ్యాఖ్యలు చేస్తున్నారని ఆమె అన్నారు. ప్రజలు పెట్టుకున్న ఆశలను చంద్రబాబు పూర్తిగా వమ్ము చేశారని ఆమె వ్యాఖ్యానించారు.