కోదండరామ్ ఆలోచించుకోవాలి: వేణుగోపాలాచారి

హైదరాబాద్: తమ పార్టీని తెలంగాణ ఐక్య కార్యాచరణ కమిటీ (జెఎసి)నుంచి బహిష్కరించడం ఏకపక్ష నిర్ణయమని తెలుగుదేశం పార్టీ తెలంగాణ నాయకుడు ఎస్ వేణుగోపాలాచారి అన్నారు. ఈ విషయంలో జెఎసి తమను కనీసం సంప్రదించలేదని ఆయన శనివారం మీడియా ప్రతినిధులతో అన్నారు. కొందరి ఒత్తిళ్ల మేరకే ఇది జరిగిందని ఆయన విమర్శించారు. ఉప ఎన్నికల కోసం రాజీనామాలు చేయడం వృధా అని ఆయన అభిప్రాయపడ్డారు. కోర్టులో శిక్షలు వేసేటప్పడు కూడా నిందితుల అభిప్రాయాలు తీసుకుంటారని, జెఎసి తమ అభిప్రాయం కూడా తీసుకోకుండా ఏకపక్షంగా నిర్ణయం తీసుకుందని ఆయన అన్నారు. జెఎసి కన్వీనర్ కోదండరామ్ ఉద్యమాన్ని ఎటు తీసుకుపోతున్నారో అర్థం కావడం లేదని ఆయన అన్నారు.

కాంగ్రెసు పార్టీ శాసనసభ్యులు రాజీనామాలు చేస్తేనే కేంద్ర ప్రభుత్వం తెలంగాణ విషయంలో దిగి వస్తుందని ఆయన అభిప్రాయపడ్డారు. రాజీనామాలు చేయాలని కాంగ్రెసుపై ఎందుకు ఒత్తిడి చేయలేదని ఆయన జెఎసిని ప్రశ్నించారు. కేంద్రంపై ఒత్తిడి తేవడానికి రాజకీయ సంక్షోభమే పరిష్కారమని ఆయన అన్నారు.