అమెరికాలో మరో తెలంగాణ సంఘం

మిన్నెసోటా: తెలంగాణ లక్ష్యంగా 'మిన్నెసొటా ఏరియా తెలుగు అసోసియేషన్‌'(మాతా) అనే మరో సంఘం అమెరికాలో ఏర్పడింది. ఫిబ్రవరి 13వ తేదీ శనివారంనాడు ప్లిమత్‌లోని ఇండియా ప్యాలెస్‌ రెస్టారెంట్‌లో ఈ సంఘం ఆవిర్భావ కార్యక్రమం జరిగింది. స్వల్పకాల పర్యటన కోసం అమెరికా వచ్చిన నల్గొండ జిల్లా భోన్‌గిర్‌ ఎంపీ కోమటిరెడ్డి రాజగోపాల్‌రెడ్డి ఈ కార్యక్రమంలో ముఖ్య అతిథిగా పాల్గొన్నారు. ప్రస్తుతం ప్రత్యేక తెలంగాణ రాష్ట్రం కోసం జరుగుతున్న పరిణామాలపై ప్రసంగించిన ఎంపీ రాజగోపాల్‌ రెడ్డి ఇందుకు సంబంధించి పలువురు అడిగిన ప్రశ్నలకు సమాధానాలిచ్చారు.

ఈ సందర్భంగా తెలంగాణ కోసం, ఈ ప్రాంత అభివృద్ధి లక్ష్యంగా పనిచేస్తున్న 'మాతా' కృషిని అభినందించారు. తెలంగాణ రాష్ట్ర పునరావిర్భావంలో తెలంగాణకు చెందిన ఎన్నారైలు కీలకపాత్ర పోషించాలని పిలుపునిచ్చిన ఆయన తన వంతుగా పూర్తి సహకారం అందిస్తానని హామీనిచ్చారు. కార్యక్రమంలో భాగంగా ఎంపీ రాజగోపాల్‌రెడ్డిని సత్కరించారు.